جرمن بُک ٹریڈ کے امن انعام کے حقدار امریکی باشندہ جیرن لانیئر

پانچ روز جاری رہ کر ختم ہونے والے اس کتب میلے کے ڈائریکٹر یورگن بوس نے میلے کی کامیابی پر اطمینان کا اظہار کرتے ہوئے کہا، "یہ کُتب میلہ نئے تصورات اور خیالات کی نشوو نما کے لیے ایک زرخیز سرزمین کی سی حیثیت رکھتا ہے"۔

فرینکفرٹ کے 2014 ء کے بین الاقوامی بُک فیئر کا نقطہ عروج جرمن بُک ٹریڈ کے امن انعام کا اعلان تھا۔ اس بار یہ انعام انٹرنیٹ کے پائینیئر یا پہل قدم امریکی باشندے جیرن لانیئر کو دیا گیا۔ اس اعزاز کے ساتھ انہیں 25 ہزار یورو کے نقد انعام سے بھی نوازا گیا۔ تقسیم انعام کی تقریب فرینکفرٹ کے پاول چرچ میں منعقد ہوئی جہاں انعام پانے والے جیرن لانیئر نے شکریہ ادا کرتے ہوئے اپنی تقریر میں ادب کی دنیا میں تبدیلی رونما کرنے والے ڈیجیٹل نظام کے غیر ضروری اور حد سے زیادہ اضافے سے خبر دار کیا۔ 54 سالہ امریکی جیرن لانیئر نے اس موقع پر ’نئی انسان پسندی اور انسان دوستی‘ پر زور دیا۔ انہوں نے کہا کہ انسان پسندی اُسی وقت ممکن ہے جب انسانوں پر یقین کیا جائے اور مصنوعی ذہانت کو شکوک و شبہات کی نگاہ سے دیکھا جائے۔ جیرن نے کہا، "بغیر انسانوں کے کمپیوٹر خلائی ہیٹر کی سی حیثیت رکھتے ہیں جن کا کام نمونہ بنانا ہے"۔

اس سال کے فرینکفرٹ عالمی کُتب میلے کے اختتام پر انڈونیشیا کے ایک معروف مصنف آننتو کوسوما نے آئندہ برس یعنی 2015 ء کے اس کتاب میلے کی مہمانی علامتی طور پر قبول کی۔ آئندہ برس اس میلے کا مہمان ملک انڈونیشیا ہوگا۔ اس بُک فیئر کی یہ روایت ہے کہ ہر سال اس کے اختتام پر اگلے سال کے مہمان ملک کے کسی ایک ادبی شاہکار وسعت دی جاتی ہے۔ اس بار انڈونیشیا کے جس ادبی شاہکار کو چنا گیا ہے وہ تیرہویں صدی کا ایک مسودہ ہے۔ ’ ارجن وجایا کے عنوان سے یہ مسودہ ہاتھ کی تحریر کی شکل میں موجود ہے اور اس کے متن کے الفاظ کچھ یوں ہیں،" جب میں اپنے لسانی مندر کے ایک خاص مقام تک پہنچ جاؤں گا تو ایک تعریفی گیت کے ساتھ اپنے خدا سے کہوں گا کہ وہ میری شاعری، میرے الفاظ جسے خوبصورتی کے قالب میں ڈھال کر میں نے اُسے خراج عقیدت پیش کیا ہے، اسے قبول کر لے" ۔

اس بار مجموعی طور پر تقریباً تین ہزار پانچ سو ایسی تقریبات اور اجتماعات کا اہتمام کیا گیا تھا، جن کا تعلق کسی نہ کسی حوالے سے کتاب اور اشاعت کی دنیا سے بنتا تھے۔ کتاب میلے کے افتتاحی دن آن لائن مصنوعات فروخت کرنے والے ادارے ایمیزون نے جرمنی کے لیے ای بُکس یا الیکٹرانک بُکس کا ایک فلیٹ ریٹ متعارف کروایا۔'کِنڈل اَن لمیٹڈ‘ نامی سروس کے تحت صارفین مہینے میں صرف تقریباً دَس یورو ادا کر کے اپنی پسند کی ڈیجیٹل کتابیں ڈاؤن لوڈ کر سکتے ہیں۔ ایمیزون کا کہنا ہے کہ اُس کے ذخیرے میں موجود ڈیجیٹل کتابوں کی مجموعی تعداد ساڑھے چھ لاکھ ہے، جن میں سے چالیس ہزار کتابیں جرمن زبان میں ہیں۔