جرمن زبان کی ترویج کا ایوارڈ، گلوکاروں کے ایک گروپ کے نام

یہ پرائز سالانہ بنیاد پر جرمن زبان کے فروغ کے لیے کی جانے والی کوششوں کے اعتراف میں دیا جاتا ہے۔ جرمن شہر کاسل میں رَیپ گلوکاروں کے ایک گروپ کو رواں برس کے جیک گرِم پرائز سے نوازا گیا۔ سن 2018 کے لیے یہ پرائز حاصل کرنے والے میوزیکل گروپ کا نام ’دی فینٹاسٹک فور‘ ہے۔ اس کو جرمن زبان میں ’ ڈی فینٹاٹشن فیئر‘ کہا جاتا ہے۔ اس گروپ کا تعلق جرمن شہر اشٹٹ گارٹ سے ہے۔ اس کے اراکین کے نام میشی بیک، تھوماس ڈی، اینڈ اپسیلون اور سموڈو ہیں۔

انعام کی تقریب میں یہ چاروں فنکار موجود تھے اور انہوں نے اسٹیج پر آ کر یہ معتبر انعام خود وصول کیا۔ اس گروپ کے ایک رکن تھوماس ڈی نے خصوصی پرائز وصول کرنے پر اظہار مسرت کرتے ہوئے کہا کہ یہ پرانے قصہ گوئی کرنے والوں کی جانب سے نئے قصہ گو فنکاروں کی صلاحیتوں کا اعتراف ہے۔

دی فینٹاسٹک فور میوزیکل بینڈ کو یہ انعام اپنی مقامی زبان کو اختراعی انداز میں پاپولر موسیقی میں استعمال کرنے پر دیا گیا ہے۔ جیکب گرِم پرائز کی جیوری کے ایک رکن ہیلموٹ گلُؤک کا کہنا ہے کہ جرمن زبان کے فروغ کے لیے موسیقی کا یہ اختراعی استعمال یقینی طور پر بریک تھرو ہے اور یہ انداز قابلِ تعریف بھی ہے۔

جرمن زبان کے فروغ اور ترویج کے لیے جیکب گرم ایوارڈ حاصل کرنے والوں میں مشہور کارٹونسٹ لوریوٹ، جرمن پارلیمنٹ کے سابق اسپیکر نوربرٹ لامیرٹ اور راک میوزک لیجنڈ اُوڈو لنڈن بیرگ کے نام بھی شامل ہیں۔ اس انعام کا مقصد جرمن زبان و ادب کے اسکالرز اور فنکاروں کی حوصلہ افزائی ہے۔

جیکب گرِم پرائز انیسویں صدی کے اسی نام کے ایک جرمن اسکالر کے نام پر رکھا گیا ہے۔ انہوں نے اپنے بھائی ولہلم کے ساتھ مل کر جرمن ادب میں خاص طور پر بچوں کے لیے کئی مشہور کہانیاں تخلیق کیں۔ یہ برادرز گرِم کے نام سے مشہور ہیں۔ جیکب گرِم چار جنوری سن 1785 میں جرمن شہر ہاناؤ میں پیدا ہوئے تھے۔ برادرز گرِم کی کہانیوں میں سینڈریلا اور لمبے سنہرے والوں کی شہزادی ’روپینزل‘ کی کہانیاں ساری دنیا میں شہرت رکھتی ہیں۔