جرمن کاسمیٹکس انڈسٹری کی ششماہی آمدن بارہ بلین یورو سے زائد

جرمنی کے تجارتی مرکز فرینکفرٹ سے موصولہ رپورٹوں کے مطابق جرمن معیشت کے ایک اہم حصے کے طور پر کاسمیٹکس کے شعبے کو اس سال جنوری کے آغاز سے لے کر جون کے اختتام تک ایسی صورت حال کا سامنا رہا، جس میں محسوس کیا جا سکتا تھا کہ صارفین کاسمیٹک مصنوعات کی خریداری پر رقوم خرچ کرنے میں ہچکچاہٹ اور بے یقینی کا مظاہرہ کر رہے تھے۔

ترکی میں سستی کاسمیٹک سرجری، سیاحوں کی توجہ کا مرکز

اس کے باوجود اس سال کے پہلے چھ ماہ کے دوران اس شعبے کی آمدنی گزشتہ برس کی پہلی ششماہی کے مقابلے میں دو فیصد بڑھ کر 12.3 بلین یورو (13.6 بلین امریکی ڈالر کے برابر) ہو گئی۔

کاسمیٹکس میں کیا کیا کچھ شامل؟

جرمن کاسمیٹکس انڈسٹری کے ان ششماہی اعداد و شمار میں صرف میک اپ مصنوعات ہی کو شامل نہیں کیا گیا، بلکہ ان میں میک اپ کے ساتھ ساتھ حفظان صحت اور جسمانی دیکھ بھال کے لیے استعمال ہونے والی تجارتی اشیاء، پرفیومز اور کپڑے دھونے کے لیے استعمال ہونے والے واشنگ پاؤڈر تک بھی شامل تھے۔

سبز چائے کا ایک اور کمال، جلدی مسائل کا علاج

اس لیے کہ یہ تمام مصنوعات جتنی بھی متنوع ہوں، وہ سب کی سب انسانوں کے لیے جسمانی دیکھ بھال کی مصنوعات کے زمرے میں آتی ہیں۔ یہ بھی ایک وجہ ہے کہ جرمنی میں کاسمیٹکس انڈسٹری کی نمائندہ ملکی تنظیم آئی کے ڈبلیو (IKW) کہلاتی ہے، اور اس سے مراد جرمن کاسمیٹک، ٹائلٹری، پرفیومری اینڈ ڈیٹرجنٹ ایسوسی ایشن ہے۔

مکڑیوں کا تیار کردہ ریشم، ادویات اور کاسمیٹکس میں ممکنہ استعمال

آئی کے ڈبلیو کے ڈیٹا کے مطابق 2024ء کی پہلی ششماہی میں ملکی کاسمیٹکس انڈسٹری کو سب سے زیادہ آمدنی واشنگ پاؤڈرز، ڈیٹرجنٹس اور کلیننگ پروڈکٹس کی فروخت سے ہوئی، جو 4.1 بلین یورو رہی اور 2023ء کی پہلی ششماہی کے مقابلے میں 8.3 فیصد زیادہ تھی۔

چہرے اور منہ کی دیکھ بھال کی مصنوعات

واشنگ پاؤڈرز کی فروخت کے ساتھ ساتھ جس ایک ذیلی شعبے میں پیداواری اور کاروباری اداروں کی آمدن کافی زیادہ رہی، وہ چہرے کی دیکھ بھال اور منہ کی صفائی کے لیے استعمال ہونے والی مصنوعات تھیں۔ ان میں چہرے کی سینکڑوں اقسام کی کریمیں، ٹوتھ پیسٹ، ماؤتھ واش اور لوشنوں سمیت سبھی کچھ شامل تھا۔

جرمن کاسمیٹکس انڈسٹری کی نمائندہ تنظیم آئی کے ڈبلیو کے مینیجنگ ڈائریکٹر ٹوماس کرائزر کے مطابق، ''ہم ایک بار پھر دیکھ رہے ہیں کہ سست روی کے شکار اقتصادی ماحول میں بھی ہمارا صنعتی شعبہ اپنی کاروباری مضبوطی کا مظاہرہ کر رہا ہے۔‘‘

آیور ویدک: 5 ہزار سال پرانی تہذیب کا نچوڑ

آئی کے ڈبلیو جرمنی میں میک اپ، باڈی کیئر پروڈکٹس اور واشنگ پاؤڈر تیار کرنے والے 440 سے زیادہ صنعتی اداروں کی نمائندہ تنظیم ہے اور اس شعبے میں کام کرنے والے کارکنوں کی تعداد 50 ہزار سے زیادہ ہے۔

اس تنظیم کے مطابق جرمنی میں ہر سال فروخت ہونے والی باڈی کیئر مصنوعات میں سے 95 فیصد سے زائد اسی تنظیم کے رکن صنعتی اداروں کی تیار کردہ ہوتی ہیں۔

م م / ع ا (ڈی پی اے)