جرمنی: اعلی عدالت نے بھی شامی شہری کی سزا برقرار رکھی

جرمنی میں فوجداری سے متعلق ایک اعلی عدالت نے منگل کے روز کہا کہ اس نے شام کی خفیہ پولیس کے رکن کے طور پر قیدیوں کو اذیت دینے میں سہولت فراہم کرنے کے الزام میں گزشتہ برس سزا پانے والے ایک شامی شہری کی اپیل کو مسترد کر دیا ہے۔

فیڈرل کورٹ آف جسٹس نے فیصلہ سنایا کہ فروری سن 2021 میں مغربی جرمن شہر کوبلنز کی ایک عدالت نے اس سلسلے میں اپنا فیصلہ سناتے ہوئے جو قید کی سزا دی تھی، اس میں کوئی قانونی غلطی نہیں ہے۔ اس فیصلے کا مطلب یہ ہوا کہ اب وہ شامی شہری اس فیصلے کو مزید چیلنج نہیں کر سکتا۔

اس شخص کو کس جرم کی سزا دی گئی؟

جرمنی کے رازداری قوانین کے تحت ایاد اے کے نام سے شناخت کیے جانے والے اس شخص کو انسانیت کے خلاف جرائم میں معاون ہونے کا مجرم قرار دیا گیا تھا اور کوبلنز کی عدالت نے اسے ساڑھے چار برس قید کی سزا سنائی تھی۔

اس شخص کو سن 2011 میں پرامن حکومت مخالف مظاہروں کے دوران گرفتار کیے گئے 30 افراد کو اس جیل میں منتقل کرنے میں ملوث ہونے کا قصوروار پا یا گیا تھا، جہاں ان کے ساتھ غیر انسانی سلوک اور ان پر تشدد کیا گیا۔

ایسا فیصلہ پہلی بار ہوا تھا کہ جس میں شام سے باہر کسی ملک کی عدالت نے ایک ایسے مقدمے میں فیصلہ سنایا، جس میں شامی حکومت کے اہلکاروں پر انسانیت کے خلاف جرائم کا الزام لگایا گیا تھا۔

بعد میں ایاد اے کی گواہی نے شام کے ایک دوسرے سابق اہلکار کی سزا میں بھی کلیدی کردار ادا کیا تھا، جس میں کوبلنز کی عدالت سے جنوری میں تقریباً 4,000 لوگوں پر تشدد کرنے اور کم از کم 27 دیگر قیدیوں کی موت میں ملوث ہونے کے جرم میں عمر قید کی سزا سنائی تھی۔

شام کے صدر بشار الاسد کی حکومت سے اختلاف رائے رکھنے والے اور انکے مخالفین کے خلاف بڑے پیمانے پر ایسے انسانیت سوز جرائم حکومت کی ایما پر کیے گئے تھے۔

ص ز/ ج ا (ڈی پی اے، ای پی ڈی، کے این اے)