جرمنی اپنی بری فوج شام بھیجے، امریکی مطالبہ

امریکا کے شام کے لیے خصوصی مندوب جیمز جیفری نے جرمنی سے مطالبہ کیا ہے کہ وہ شام میں کرد ملیشیا کی زیر قیادت اپوزیشن کے اتحاد سیریئن ڈیموکریٹک فورسز کو دہشت گرد تنظیم داعش کا مقابلہ کرنے کے لیے تربیت فراہم کرے۔ امریکا کا مطالبہ ہے کہ جرمن شامی اپوزیشن اتحاد کی تربیت اور معاونت کے لیے اپنے عسکری ماہرین کے علاوہ بری فوج کے دستے بھی شام بھیجے۔

جرمن نیوز ایجنسی ڈی پی اے کو دیے گئے انٹرویو میں جیمز جیفری نے کہا، ’’ہم چاہتے ہیں کہ جرمن فوجی جزوی طور پر شام میں تعینات امریکی فوجیوں کی جگہ لیں۔‘‘ ڈی پی اے اور جرمن اخبار 'ویلٹ ام زونٹاگ‘ کے مطابق امریکی خصوصی مندوب نے یہ بھی بتایا کہ انہیں امید ہے کہ جرمن حکام اس ضمن میں رواں ماہ کے آخر تک اپنے فیصلے سے انہیں آگاہ کر دیں گے۔

شام کے لیے امریکی خصوصی مندوب جیمز جیفری جمعہ پانچ جولائی کے روز جرمنی کے دورے پر برلن پہنچے تھے۔ اس دورے کا مقصد برلن حکومت کو شامی تنازعے میں عسکری اور مالی تعاون فراہم کرنے پر قائل کرنا تھا۔ تاہم انہوں نے یہ واضح نہیں کیا کہ امریکا نے جرمنی سے کتنی تعداد میں فوجی شام میں تعینات کرنے کا مطالبہ کیا ہے۔

ڈی پی اے کو دیے گئے انٹرویو میں اعلیٰ امریکی سفارت کار نے یہ بھی واضح کیا کہ شام میں تعینات کیے جانے والے فوجی اہلکار داعش کے جنگجوؤں سے لڑائی میں براہ راست حصہ نہیں لیں گے لیکن ان پر حملے کی صورت میں دوبدو لڑائی کے امکان کو بھی رد نہیں کیا جا سکتا۔ ان کا کہنا تھا، ’’بہتر یہ ہے کہ مقامی شامی عسکری گروہوں کی مدد سے داعش کو پسپا کیا جائے لیکن بین الاقوامی افواج کی ایک خاص تعداد میں موجودگی ان فورسز کو تربیت اور تکنیکی معاونت فراہم کرنے کے لیے ضروری ہے۔‘‘

شام اور عراق میں داعش مخالف بین الاقوامی اتحاد میں اسی سے زائد ممالک شامل ہیں اور اس مقصد کے لیے فی الوقت جرمن عسکری ماہرین اور جنگی جہاز عراق میں تعینات ہیں۔ جون میں عراق کے دورے کے دوران جرمن وزیر خارجہ ہائیکو ماس نے عندیہ دیا تھا کہ جرمن فوجی مشن کی تعیناتی کی مدت اکتوبر میں ختم ہو رہی ہے لیکن وقت آنے پر اس تاریخ میں توسیع کے بارے میں سوچا جا سکتا ہے۔

(بین نائیٹ) ش ح / ا ا