جرمنی بہت سے کیمیائی ہتھیار حاصل اور نصب کرنا چاہتا تھا

اب ہونے والا یہ انکشاف سیاسی طور پر اس دور سے متعلق ہے جب 60 کے عشرے میں سرد جنگ کا زمانہ اپنے عروج پر تھا اور 1963ء میں منقسم جرمنی کے مغربی حصے پر مشتمل وفاقی جمہوریہ نے امریکا سے ایک درخواست کی تھی۔

امریکا اور جرمنی کی مسلح افواج کی طرف سے حال ہی میں نصف صدی سے بھی زیادہ عرصہ پرانی جو خفیہ عسکری دستاویزات جاری کر دی گئی تھیں، ان کا تحقیقی تجزیہ چند جرمن میڈیا ہاؤسز نے مشترکہ طور پر کیا۔ اخبار ’زُوڈ ڈوئچے سائٹنگ‘ اور دو نشریاتی اداروں این ڈی آر اور ڈبلیو ڈی آر کے ماہر صحافیوں نے اس بارے میں جو چھان بین کی، یہ انکشاف اسی کے نتیجے میں ممکن ہو سکا۔

اہم بات یہ ہے کہ ماضی میں مغربی جرمنی اور پھر متحدہ جرمنی کی وفاقی حکومت اور وفاقی فوج نے ہمیشہ اس بات سے انکار کیا تھا کہ جرمنی نے کبھی کیمیائی ہتھیاروں کے حصول، ان کی تنصیب یا ممکنہ استعمال کا کوئی منصوبہ بنایا تھا۔

اب عام کر دی گئی ان جرمن امریکی فوجی دستاویزات سے پتہ چلتا ہے کہ سابقہ مغربی جرمنی کی وزارت دفاع نے انیس سو تریسٹھ میں امریکی حکومت سے درخواست کی تھی کہ اسے کیمیائی ہتھیار مہیا کیے جائیں۔ تب پینٹاگون شروع میں اگرچہ کافی حد تک آمادہ بھی ہو گیا تھا تاہم بعد میں امریکا نے یہ درخواست مسترد کر دی تھی۔

اس دور میں متعدد بین الاقوامی معاہدوں کی وجہ سے وفاقی جمہوریہ جرمنی کو کیمیائی ہتھیار تیار کرنے، ان کے حصول، تنصیب یا انہیں استعمال کرنے کی اجازت نہیں تھی۔

اس کا پس منظر یہ تھا کہ دوسری عالمی جنگ کے بعد جب منقسم جرمنی کے سوویت دستوں کے زیر قبضہ مشرقی حصے میں کمیونسٹ مشرقی جرمن ریاست قائم ہو گئی تھی، تو امریکا اور اتحادی طاقتوں کے زیر قبضہ مغربی جرمنی کو ایک وفاقی جمہوریہ بنایا ہی اس مقصد کے تحت گیا تھا کہ دوبارہ کبھی نوبت جنگ، آؤشوِٹس جیسے اذیتی کیمپوں اور کیمیائی ہتھیاروں تک نہیں پہنچنا چاہیے۔

لیکن پھر وفاقی جمہوریہ جرمنی کے قیام کے 20 سال سے بھی کم عرصے بعد جب اس دور کی مغربی جرمن حکومت نے نیٹو رہنماؤں کے ساتھ انتہائی خفیہ ملاقاتوں میں دوبارہ کیمیائی ہتھیاروں کے ممکنہ حصول سے متعلق بحث چھیڑی تو واشنگٹن حکومت نے یہ درخواست رد کر دی تھی۔

تب اس دور کی وفاقی جرمن فوج کے انسپکٹر جنرل فریڈرش فؤرچ نے کہا تھا، ’’اگر سوویت یونین نے اچانک حملہ کر دیا، تو نیٹو کا خیال یہ ہے کہ وارسا معاہدے میں شامل ممالک کے راستے کیمیائی ہتھیاروں سے ایک فوری جوابی حملہ لازمی ہو گا۔ لیکن کیمیائی ہتھیاروں کے حصول اور تنصیب کے بغیر ہمارے پاس ایسا کچھ کرنے کے لیے عسکری وسائل موجود ہی نہیں ہیں۔‘‘

انہی عسکری دستاویزات کے مطابق 1963ء میں اس دور کے مغربی جرمن وزیر دفاع کائی اُووے فان ہاسے نے بھی خفیہ طور پر واشنگٹن سے کہا تھا کہ جرمنی کو کیمیائی ہتھیار فراہم کیے جانا چاہییں۔ ان تاریخی کاغذات میں یہ بھی لکھا ہوا ہے کہ تب فیڈرل جرمن آرمی نے کہا تھا کہ اگر جنگ چھڑ گئی، تو امریکا کو جرمنی کو قریب 14 ہزار ٹن کیمیائی ہتھیار مہیا کرنا چاہییں۔

انہی دستاویزات میں سے ایک اس بارے میں بھی ہے کہ آہنی پردے کے آر پار کے فریقین کے مابین اگر جنگ چھڑ جاتی تو کیمیائی ہتھیاروں کے ممکنہ استعمال کی صورت میں فضا سے پھینکے جانے والے ایسے زہریلے ہتھیاروں سے ہوا کی رفتار اور ہوائی جہازوں کی بلندی کو پیش نظر رکھتے ہوئے کتنے علاقے کو نشانہ بنایا جا سکتا تھا۔

ان تازہ انکشافات کے بعد برلن میں وفاقی وزارت دفاع سے جب جمعرات تین مئی کے روز جرمنی میں کیمیائی ہتھیاروں کے بارے میں اس کا موقف دریافت کیا گیا، تو ایک ترجمان نے بتایا، ’’جرمن سرزمین پر جرمن فوج کے پاس یا جرمنی کے نیٹو اتحادیوں کے پاس کوئی ایک بھی کیمیائی ہتھیار موجود نہیں ہے۔‘‘