’جرمنی مجرموں کے لیے محفوظ ٹھکانہ بنتا جا رہا ہے‘

خبر رساں ادارے ڈی پی اے نے ترک وزیر خارجہ مولود چاؤش آولُو کے حوالے سے بتایا ہے کہ جرمنی کردستان ورکرز پارٹی (پی کے کے)  اور امریکا میں مقیم جلا وطن ترک مبلغ فتح اللہ گولن کی تحریک کے لیے ’محفوظ ٹھکانہ‘ بنتا جا رہا ہے۔ ترکی فتح اللہ گولن پر ہی الزام دھرتا ہے کہ وہ سن دو ہزار سولہ کی ناکام فوجی بغاوت میں ملوث تھے۔ تاہم فتح اللہ گولن ایسے تمام تر الزامات کی تردید کرتے ہیں۔

منگل چھ مارچ کی شب برلن میں صحافیوں سے گفتگو میں ترک وزیر خارجہ کا کہنا تھا کہ جرمنی کو ترک حکومت کے ان تحفظات کو دور کرنا چاہیے۔ انہوں نے کہا کہ فتح اللہ گولن کی تحریک سے وابستہ ایسے 768 افراد نے جرمنی میں پناہ کی درخواست دی، جن کا ترکی کو ناکام فوجی بغاوت میں ملوث ہونے کا شبہ ہے تاہم برلن حکومت ان میں سے چار سو ایک افراد کو پناہ دے چکی ہے۔

منگل کی رات برلن میں انہوں نے ایسے خدشات کا اظہار کرتے ہوئے مزید کہا کہ انقرہ توقع کرتا ہے کہ جرمنی ان ’مجرموں‘ کے بارے میں زیادہ محتاط رہے گا۔ جرمن وزیرخارجہ کے ساتھ ملاقات میں انہوں نے کہا کہ جرمن شہریوں کے لیے ترکی کے سفر کے حوالے سے جاری شدہ وارننگ کو واپس لے لیا جائے کیونکہ اس باعث ترکی کی سیاحت کی صنعت کو نقصان ہو رہا ہے۔

ترک حکومت متعدد مرتبہ شکایت کر چکی ہے کہ  کرد باغیوں کے خلاف جرمنی کا رویہ کافی زیادہ نرم ہے۔ کردستان ورکرز پارٹی کو نہ صرف ترکی بلکہ یورپی یونین اور امریکا نے بھی دہشت گرد قرار دے رکھا ہے۔ اس تحریک سے وابستہ جنگجو ترکی سے علیحدگی کی مسلح جدوجہد جاری رکھے ہوئے ہیں۔

ترک وزیر خارجہ مولود چاؤش آولُو نے منگل کی شام اپنے ترک ہم منصب زیگمار گابریل کے ساتھ ملاقات میں یہ بھی کہا کہ جرمن شہریوں کے لیے ترکی کے سفر کے حوالے سے جاری کردہ وارننگ کو واپس لیا جائے۔ انہوں نے کہا کہ یہ باہمی تعلقات میں بہتری کی کوششوں اور ترکی کے موجودہ حالات سے مطابقت نہیں رکھتی۔ گزشتہ برس جولائی میں ترکی میں بے جا گرفتاریوں کے نتیجے میں یہ وارننگ جاری کی گئی تھی۔ اس وجہ سے ترکی کی سیاحت کی صنعت کو نقصان ہو رہا ہے۔

جرمن وزیر خارجہ آج بدھ کے دن برلن میں جاری ٹریڈ شو آئی ٹی بی میں بھی شرکت کر رہے ہیں۔ انہوں نے جرمنی کا یہ دورہ ایک ایسے وقت میں کیا ہے، جب ان دونوں ممالک کے تعلقات میں کشیدگی واضح ہے۔ تاہم کوشش جاری ہے کہ اس تناؤ میں کمی کی خاطر مذاکرات کا سلسلہ جاری رہے۔