جرمنی نے روس میں نیا سفیر مقرر کر دیا

جرمن حکومت نے روسی حکومت کی منظوری کے بعد ماسکو میں اپنے نئے سفیر کی تعیناتی کا اعلان کر دیا۔

نئے سفیر الیگزنڈر لیمبسڈورف ماسکو میں گیزا آندریاس وان گیئر کے جانشین ہوں گے، جو سن 2019 سے اس عہدے پر فائز ہیں۔

جرمن وزارت خارجہ کے ترجمان نے کہا کہ "وہ اس موسم گرما میں اپنے عہدے کی ذمہ داریاں سنبھالیں گے۔"

گزشتہ برس یوکرین پر روس کے فوجی حملے کے بعد سے ماسکو میں جرمنی کے سفارتی مشن کی قیادت سب سے پیچیدہ عہدوں میں سے ایک ہے۔

روس ميں جرمن سرکاری ملازمين کی تعداد ميں کمی، معاملہ کيا ہے؟

اس سال کے اوائل میں روس نے متعدد جرمن سفارت کاروں کو ملک بدر کر دیا تھا اور دعویٰ کیا تھا کہ یہ اقدام برلن کی جانب سے اسی طرح کی کارروائی کے جواب میں کیا گیا تھا۔

 الیگزنڈر لیمبسڈورف کون ہیں؟

نئے سفیر کا تعلق اشرافیہ کے ایک خاندان سے ہے۔ مزید برآں ان کے چچا اوٹو گراف لیمبسڈورف 1970اور 1980 کی دہائیوں میں طویل عرصے تک خدمات انجام دینے والے وزیر اور ایک زیرک سیاست داں تھے۔

اپنے چچا کی طرح ہی الیگزنڈر لیمبسڈورف بھی نیو لبرل فری ڈیموکریٹ (ایف ڈی پی) پارٹی کے رکن اور سرکردہ رہنما ہیں۔

صدر پوٹن ’مکر و فریب کا کھیل‘ کھیل رہے ہیں، جرمنی

وہ فی الحال جرمن پارلیمان کے رکن ہیں، جہاں وہ ایف ڈی پی کی پارلیمانی پارٹی کے ڈپٹی لیڈر کے عہدے پر فائز ہیں۔

چھپن سالہ الیگزنڈر لیمبسڈورف اس سے قبل جرمن فارن سروس میں کئی عہدوں پر کام کرچکے ہیں، جن میں واشنگٹن میں پریس ڈپارٹمنٹ میں خدمات اور یورپی پارلیمان کے رکن کے طورپر خدمات شامل ہیں۔

جرمنی کو روس کی طرف سے غلط فہمیاں پھیلانے کا خطرہ

انہو ں نے سن 2003 اور 2004 کے درمیان جرمن خارجہ سروس میں روسی امور کے ماہر کے طور بھی خدمات انجام دیں۔

 ج ا/ ص ز (ڈی پی اے، اے ایف پی)