ایشیا کا طاقتور ترین سمندری طوفان ویتنام سے ٹکرا گیا

یاگی نامی یہ طوفان آج ہفتہ سات ستمبر کو مقامی وقت کے مطابق دن کے ایک بجے ویتنام کے شمالی اضلاع سے ٹکرایا۔ اس وقت اس طوفان کے مرکز کے قریب 160 کلومیٹر فی گھنٹہ کی رفتار سے ہوائیں چل رہی تھیں۔ ایک دن قبل ہینان میں ٹکرانے کی نسبت اب طوفان کی طاقت نسبتاﹰ کم ہو چکی ہے۔ ہینان میں اس طوفان کے ساتھ 234 کلومیٹر فی گھنٹہ کی رفتار سے ہوائیں چل رہی تھیں۔

سمندری طوفان اسنیٰ کراچی کے ساحل سے ٹل گيا

'بہت خطرناک' طوفان 'بیرل' کیریبین کی طرف بڑھتا ہوا

ویتنام کا ساحلی شہر ہاییفونگ اب تک ان طوفانی ہواؤں سے سب سے زیادہ متاثر ہونے والے شہروں میں سے ایک ہے۔ 20 لاکھ کی آبادی والا یہ شہر ویتنام کا صنعتی مرکز ہے، جہاں غیر ملکی ملٹی نیشنل کمپنیوں اور مقامی کار ساز کمپنی ون فاسٹ کی فیکٹریاں موجود ہیں۔ حکام کا کہنا ہے کہ شہر کے کچھ حصوں میں بجلی منقطع ہو گئی ہے۔

ایک عینی شاہد نے خبر رساں ادارے روئٹرز کو بتایا کہ ہوا سے عمارتوں کے شیشے ٹوٹ گئے اور درختوں کی شاخیں ٹوٹ گئیں۔

حکام کی طرف سے شہریوں کو گھروں کے اندر ہی رہنے کا کہا گیا تھا جس کی وجہ طوفان کے ٹکرانے کے وقت شہر کی سڑکیں ویران تھیں۔

اس سے قبل ایک کروڑ سے زائد آبادی والے چینی شہر ہینان میں یاگی نامی اس طوفان کے سبب درخت ٹوٹ کر گئے اور سڑکوں پر پانی بھر گیا تھا۔ اس سبب آٹھ لاکھ سے زائد گھروں کی بجلی منقطع ہوگئی تھی۔

ہوائی اڈے بند

ویتنام کی حکومت نے کہا ہے کہ ساحلی قصبوں سے تقریباﹰ 50 ہزار افراد کو نکالا گیا ہے اور قریب ساڑھے چار لاکھ فوجی اہلکار تعینات کیے گئے ہیں۔

اس طوفان کے سبب آج ہفتہ کو ویتنام کے چار ہوائی اڈوں پر بھی کئی گھنٹوں کے لیے پروازیں روک دی گئیں۔ ان میں ملک کے شمالی حصے کا مصروف ترین ہنوئی کا ایئرپورٹ نوئی بائی بھی شامل ہے ، جہاں سے 300 سے زیادہ پروازیں منسوخ کردی گئیں۔ دارالحکومت ہنوئی سمیت 12 شمالی صوبوں میں ہائی اسکول بھی بند کر دیے گئے ہیں۔

سائنس دانوں کا کہنا ہے کہ موسمیاتی تبدیلیوں کے سبب گرم ہوتے سمندروں کی وجہ سے سمندری طوفان زیادہ مضبوط ہو رہے ہیں۔ گزشتہ ہفتے جاپان کے جنوب مغربی علاقے میں سمندری طوفان شانشان آیا تھا جو کئی دہائیوں میں جاپان میں آنے والا سب سے طاقتور طوفان تھا۔

ا ب ا/ع ت (روئٹرز، اے ایف پی)