’روسی ایتھلیٹس کے لیے کھیلوں کی عدالت کا فیصلہ افسوس ناک ہے‘

سوئٹزرلینڈ کے شہز لوزان میں واقع کھیلوں کے معاملات کی نگرانی کرنے والی عالمی عدالت یا کورٹ آف آربیٹریشن فار اسپورٹس (Court of Arbitration for Sport) نے اُن اٹھائیس روسی ایتھلیٹوں پر عائد تاحیات پابندی ختم کرنے کا فیصلہ کیا ہے، جنہیں ممنوعہ ادویات کے استعمال کرنے پر کھیلوں میں شرکت سے تاحیات دور کر دیا گیا تھا۔ اس فیصلے پر روس کی اینٹی ڈوپنگ لیبارٹی کے سابق سربراہ گریگوری روڈ چینکوف نے شدید تنقید کی ہے۔

لیجنڈری شاطر کیسپیروف ایک مرتبہ پھر شطرنج کی بساط پر

’برطانیہ کی یورپی یونین سے علیحدگی کا فائدہ پوٹن کو ہوا‘

روسی تاریخ کا بدترین ڈوپنگ اسکینڈل، لیکن مقدمہ ایک بھی نہیں

ماریا شاراپووا ڈوپ ٹیسٹ میں ناکام

روڈ چینکوف کے مطابق روسی ایتھلیٹوں پر پابندی ختم کرنے کے عدالتی فیصلے سے صرف دھوکہ دینے والوں کو فائدہ حاصل ہوا ہے اور وہ یقیناً اگلے دنوں میں مزید ایسے افعال ادا کرنے سے گریز نہیں کریں گے۔

کھیلوں کے معاملات کی نگرانی کرنے والی ثالثی عدالت نے روسی ایتھلیٹوں پر عائد تا حیات پابندی ختم کرنے کا فیصلہ جمعرات پہلی فروری کو سنایا ہے۔ عدالت کے مطابق اس پابندی کو برقرار رکھنے کے لیے شہادتیں ناکافی ہیں اور اس بنیاد پر یہ پابندی ختم کی گئی ہے۔

روڈ چینکوف کے امریکی وکیل جم ویلڈن نے بھی عدالتی فیصلے پر کڑی نکتہ چینی کی ہے۔ جم ویلڈن نے عالمی عدالت کی جانب سے سنائے جانے والے فیصلے کو مایوس کن اور نامناسب قرار دیا۔ ویلڈن کے مطابق روڈ چینکوف کے بیان کی توثیق فورینزک رپورٹس سے بھی ممکن ہے لیکن عدالت نے ان کی موجودگی میں شہادتوں کو ناکافی قرار دیا ہے۔

روسی اہلکار کے توسط سے ہی یہ معاملہ عالمی توجہ حاصل کر سکا تھا کہ روسی ایتھلیٹوں کے ممنوعہ ادویات کے استعمال میں ماسکو حکومت میں شامل ہے اور اسی طرح ڈوپنگ کے لیے بھی غیر معیاری طریقہ استعمال کیا گیا تھا۔ یہ انکشافات عالمی برادری میں صدر ولادیمیر پوٹن کی حکومت کی جگ ہنسائی کا سبب بنے تھے۔

عالمی عدالت نے روسی ایتھلیٹوں پر پابندی ختم کرنے کے ساتھ ساتھ تاہم یہ بھی واضح کیا ہے کہ وہ رواں برس کے سرمائی اولمپکس میں شرکت کے صرف اُس صورت میں اہل ہیں اگر انہیں انٹرنینشل اولمپک کمیٹی باقاعدہ طور پر شرکت کی اجازت یا دعوت دیتی ہے۔ سرمائی اولمپکس رواں مہینے کے دوران جنوبی کوریا کے شہر پیونگ یانگ میں منعقد ہو رہے ہیں۔