روسی صدر پوٹن کی میراتھن پریس کانفرنس

تقریباً ایک سال کی خاموشی کے بعد روسی صدر ولادیمیر پوٹن اپنی سالانہ اختتامی پریس کانفرنس سے خطاب کرنے والے ہیں۔ یہ پریس کانفرنس جمعرات کو ہوگی اور اسے سرکاری ٹیلی ویژن پر براہ راست نشر کیا جائے گا۔

پوٹن جو وزیر اعظم یا صدر کے طورپر سن 2000 سے روس پر برسراقتدار ہیں، گزشتہ سالوں میں بیشتر اوقات ان میڈیا پروگراموں کا انعقاد کرتے رہے ہیں۔ یہ پریس کانفرنسز بعض اوقات چار گھنٹے سے بھی زیادہ چلتی ہیں۔

کریملن کے ترجمان دمتری پیسکوف نے بتایا کہ جمعرات کے روز ہونے والی پریس کانفرنس مقامی وقت کے مطابق صبح دس بجے شروع ہوگی اور تقریباً تین گھنٹے تک جاری رہنے کی توقع ہے۔ انہوں نے تاہم واضح کیا کہ اس کے لیے وقت کی کوئی حد متعین نہیں ہے۔

یوکرین میں اگلے محاذوں پر کامیاب ہو رہے ہیں، پوٹن

گزشتہ دسمبر میں پوٹن نے دس سال میں پہلی مرتبہ پریس کانفرنس منسوخ کردی تھی۔ کریملن پر نگاہ رکھنے والوں کا کہنا تھا کہ پوٹن بین الاقوامی صحافیوں کے سوالات سے بچنا چاہتے تھے کیونکہ ان کی فوج کو یوکرین میں مسلسل ناکامیوں کا سامنا کرنا پڑا تھا۔

لیکن یوکرین کے خلاف اپنے جارحانہ اقدام کے تقریباً دو سال بعد پوٹن شاید اس خیال کو بدل دینا چاہتے ہیں۔ یوکرین کی تازہ ترین کارروائی روس کے محفوظ فوجی حصار کو توڑنے میں ناکام رہی ہے اور اس کے اتحادیوں کی حمایت بھی کم ہوتی جارہی ہے۔

پوٹن کی پریس کانفرنس کیسی لگتی ہے؟

پوٹن نے حال ہی میں اعلان کیا تھا کہ وہ مارچ 2024 کے انتخابات میں ایک اور صدارتی مدت کے لیے حصہ لیں گے۔  وہ اپنی پریس کانفرنسوں کا استعمال خود کو تمام مسائل کا حل کرنے والے کے طور پر پیش کرنے کے لیے کرتے ہیں۔

سال کے اواخر میں ہونے والی پوٹن کی سابقہ پریس کانفرنسوں کے برخلاف اس بار سرکاری طورپر تصدیق کا کوئی طریقہ کار نہیں اپنایا گیا ہے اور کریملن نے صرف منتخب صحافیوں کو دعوت نامی جاری کیے ہیں۔

وہ سات روسی جنہیں پوٹن کی مخالفت کی قیمت ادا کرنی پڑی

پریس کانفرنس کے بعد عام روسیوں کے سوالات کے جواب دیے جائیں گے جسے "ولادیمیر پوٹن سے براہ راست بات چیت " کہا جاتا ہے لیکن اس کے لیے سوالات کے سلسلے میں ایک محتاط طریقہ کار اپنایا جاتا ہے۔

جن "خوش قسمت" شہریوں کوپوٹن سے سوال پوچھنے کا موقع ملتا ہے ان کے بیشتر سوالات گھریلو مسائل، صحت کی دیکھ بھال، معیشت اور بنیادی ڈھانچے جیسے عام موضوعات پر ہوتے ہیں۔

روس کے سرکاری میڈیا کے مطابق ڈیڑھ ملین سے زائد سوالات جمع ہوئے ہیں۔

 ج ا/ ص ز (اے ایف پی، ڈی پی اے)