’سائبر خلافت‘ کا ’سائبر جہاد‘

ان ہیکرز کا کہنا ہے کہ یہ اقدام امریکی بمباری کا نشانہ بننے والے آئی ایس جنگجوؤں کے ساتھ اظہار ہمدردی کے طور پر کیا گیا ہے۔ امریکی سنٹرل کمانڈ کی ٹوئیٹ فیڈ پر ہیکرز نے جو پیغام پوسٹ کیا، اُس میں درج ہے، ’امریکی فوجیو، ہم آ رہے ہیں، اپنی پشت پر دیکھو، آئی ایس‘۔ ہیکرز کے اس گروپ نے انتہا پسند اسلامی گروپ کے نام کی جگہ ایک متبادل نام استعمال کرتے ہوئے یہ پیغام پوسٹ کیا ہے۔

امریکی خفیہ ادارہ ایف بی آئی اس واقعے کی تحقیقات کر رہا ہے۔ دریں اثناء امریکی حکام نے یہ اعتراف کیا ہے کہ ہیکرز نے امریکی ہائی کمان کے ٹوئٹر اور یوٹیوب اکاؤنٹس کو قریب 30 منٹ تک اپنی کارروائی کا نشانہ بنائے رکھا، جو باعثِ شرم ضرور تھا لیکن یہ کہ اس دوران کوئی زیادہ نقصان نہیں ہوا ہے۔

پینٹاگون کے ایک ترجمان کرنل اسٹیو وارن نے ایک بیان میں کہا، ’یہ تکلیف دہ اور جھنجلاہٹ کا سبب بننے والا عمل ضرور ہے تاہم اس ٹوئٹ پیغام کے ذریعے ہیکرز کسی بھی طرح کی حساس یا خفیہ معلومات تک نہیں پہنچ پائے‘۔

اُدھر امریکی دفاعی حکام نے ایک بیان میں کہا کہ، ’ہیکرز کی کارروائی سے فعال ملٹری نیٹ ورک پر یا اس کی سرگرمیوں پر کوئی اثرنہیں پڑا ہے‘۔

مشرق وسطیٰ میں امریکا اور اُس کی بین الاقوامی اتحادی فورسز کی طرف سے اسلامک اسٹیٹ پر فضائی حملے کیے جاتے رہے ہیں۔

امریکی سنٹرل کمانڈ کے ٹوئٹر اور یو ٹیوب اکاؤنٹس ہیک کر نے کے بعد ٹوئیٹ فیڈ پر پوسٹ کیا جانے والا پیغام کچھ یوں تھا، ’خُدائے بزرگ و برتر کے نام سے جو بڑا مہربان اور نہایت رحم والا ہے، سائبر خلافت اپنا سائبر جہاد جاری رکھے گی‘۔

اس ٹوئٹر اکاؤنٹ پر امریکی جرنیلوں اور اُن سے متعلق پتوں کی ایک فہرست شائع کی گئی ہے اور اس کا عنوان ہے، ’آرمی جنرل آفیسر پبلک روسٹر 2 جنوری 2014 ء‘۔ اس فہرست میں عہدوں کے حساب سے فوجیوں کے نام درج کیے گئے ہیں۔ اس کے بعد کی پوسٹ میں درج ہے، ’پینٹاگون نیٹ ورک ہیک ہو گیا! چینی منظر نامہ، پینٹاگون نیٹ ورک ہیک ہو گیا! کوریائی منظر نامہ‘۔

نیوز ایجنسی روئٹرز نے ہیکرز کی طرف سے جاری کردہ چند دستاویزات کا جائزہ لیا ہے تاہم کسی سے بھی یہ پتہ نہیں چل سکا ہے کہ امریکی نیشنل سکیورٹی کے حوالے سے کوئی خفیہ معلومات حاصل کی گئی ہیں۔

ہیکنگ کے بعد امریکی سنٹرل کمانڈ کے ٹوئیٹ اکاؤنٹ پر سفید اور کالے ہیڈ اسکارف کے ساتھ ایک شکل پوسٹ کی گئی اور ساتھ یہ الفاظ درج تھے، ’سائبر خلافت‘ اور ’آئی ایس آئی ایس، میں تم سے محبت کرتا ہوں‘۔