سائفر کیس فیصلے پر کڑی تنقید، حکومت کی طرف سے فیصلے کا دفاع

 سابق وزیراعظم  عمران خان  اور سابق وزیر خارجہ شاہ محمود قریشی کو دی جانے والی سزاؤں کے حوالے سے کئی حلقے یہ خدشہ ظاہر کر رہے ہیں کہ ان سزاؤں کے پاکستان کی مستقبل کی سیاست پر منفی اثرات ہوں گے اور یہ کہ اس فیصلے سے مستقبل کے منتخب وزرائے اعظم کے لیے مشکلات بڑھیں گی۔

واضح رہے کہ آج ایک خصوصی عدالت نے اڈیالہ جیل میں سماعت کرتے ہوئے عمران خان اور شاہ محمود قریشی کو دس دس سال کی  قید کی سزا سنائی تھی۔ عمران خان کے وکلا نے کل ہی دعویٰ کیا تھا کہ انہیں عدالت کے اندر نہیں جانے دیا گیا اور یہ کہ عدالت نے اپنی ہی طرف سے وکیل دفاع مقرر کردیے، جنہوں نے گواہان اور دوسرے لوگوں پر جرح کی۔

پی ٹی آئی  اس کو انصاف کا قتل قرار دیتی ہے جبکہ حکومت کا اصرار ہے کہ یہ سزا تمام قانونی تقاضوں کو پوری کر کے دی گئی ہے۔

عمران خان اور شاہ محمود قریشی پہ الزام تھا کہ انہوں نے سائفر کو اپنے ذاتی مقاصد کے لیے استعمال کر کے قومی سلامتی کو خطرے میں ڈالا ہے۔

فیصلہ متوقع تھا

پاکستان  تحریک انصاف کے ایک مرکزی رہنما اور سمندر پار پاکستانیوں کے امور کے سابق وزیر سید ذوالفقار عباس بخاری عرف زلفی بخاری نے ڈی ڈبلیو کو بتایا، ''میں نے کل ہی ٹویٹ کر دی تھی کہ اس طرح کی سزا دی جائے گی۔ حکومت یہ سمجھتی ہے کہ عمران خان کو سزا دے کر وہ ہمیں ڈرانے میں کامیاب ہو جائے گی لیکن اس سے عمران خان کی پوزیشن مزید مضبوط ہوگی۔‘‘

زلفی بخاری کے مطابق ان کے خیال میں یہ فیصلہ متوقع تھا۔ ''جس طرح رات کے اندھیرے میں غیر قانونی سرگرمیاں جاری تھیں اس سے یہ واضح تھا کہ اس طرح کا فیصلہ آئے گا۔ عمران خان کے وکیل دفاع کو گواہوں پر جرح کی اجازت نہیں دی گئی اور نہ ہی وہ  عمران خان کی عدالت میں نمائندگی کر

سکے۔‘‘

الزامات میں کوئی جان نہیں تھی

سائفر کیس میں الزامات کے حوالے سے زلفی بخاری کا کہنا تھا کہ ان الزامات میں کوئی جان نہیں تھی۔ ''اگر جان ہوتی تو سپریم کورٹ اس مقدمے میں عمران خان کو ضمانت نہیں دیتا۔ کیونکہ سپریم کورٹ کو پتہ تھا کہ ان الزامات میں اتنی جان نہیں جتنا کہ حکومت ظاہر کر رہی ہے۔‘‘

ان کا کہنا تھا کہ اب اس فیصلے کو عدالت میں چیلنج کیا جائے گا۔ ''ہمیں امید ہے کہ عدالت اسے غیر قانونی قرار دے دے گی۔‘‘

’ایبسولوٹلی ناٹ‘  کہنے کی سزا

پی ٹی آئی وومن ونگ ہزارہ ڈویژن کی سینیئر نائب صدر تہمینہ فہمیم کا کہنا ہے کہ اس فیصلے سے پی ٹی آئی کے کارکنان کے حوصلے بڑھیں گے۔ ''اس فیصلے نے ثابت کر دیا ہے کہ عمران خان کو ایبسولوٹلی ناٹ کہنے کی سزا دی جا رہی ہے۔ اس فیصلے سے حکومت کے خلاف نفرت میں اضافہ ہوگا اور عمران خان کے لیے کارکنوں کے دلوں میں عزت بڑھے گی۔‘‘

عدالتی کارروائی پر سوالات

 یہ فیصلے اور عدالتی کارروائی بھی کئی حلقوں میں زیر بحث ہے۔ سپریم کورٹ کے وکیل فیصل چوہدری کا کہنا ہے کہ جس طرح عدالتی کارروائی چلائی گئی وہ ساری کی ساری قانونی طور پہ انتہائی کمزور ہے۔ انہوں نے ڈی ڈبلیو کو بتایا، ''اس عدالتی کارروائی کے لیے یہی کہا جا سکتا ہے کہ پوری کارروائی شرمناک انداز میں چلائی گئی جس میں انصاف کے تمام اصولوں کو پامال کیا گیا۔‘‘

فیصل چوہدری کے مطابق جج صاحب نے جس تیزی سے اس مقدمے کو چلایا ہے اس پر بھی کئی سوالات اُٹھ رہے  ہیں۔ ''مزید برآں پوری عدالتی کارروائی میں کوئی بھی ایک نقطہ ایسا نہیں ہے، جسے قانونی کہا جائے۔‘‘

سزا کا دفاع

تاہم سزا کا دفاع کرنے والوں کا خیال ہے کہ پاکستان تحریک انصاف کے تمام اعتراضات بے بنیاد ہیں۔ سپریم کورٹ بار ایسوسی ایشن  کے سابق صدر اور بلوچستان حکومت کے وزیر برائے قانون و پارلیمانی امور امان اللہ کنرانی کا کہنا ہے کہ خصوصی عدالتوں کی کارروائی روزانہ کی بنیاد پر ہونا کوئی غیر معمولی بات نہیں ہے۔ انہوں نے ڈی ڈبلیو کو بتایا، ''اس بات پر اعتراض کیا جا رہا ہے کہ عدالت نے اتنی تیزی کے ساتھ اس مقدمے کا فیصلہ کیوں کیا یا سماعت روزانہ کی بنیاد پر ہوئی۔ تو خصوصی عدالتوں کے حوالے سے یہ کوئی نئی بات نہیں ہے۔ بالکل اسی طرح قانونی طور پر یہ ضروری نہیں ہے کہ میڈیا یا عام لوگوں کی موجودگی ٹرائل کورٹ میں ہو کیونکہ اس سے گواہوں اور ملزمان پر اثر پڑ سکتا ہے۔‘‘

پی ٹی آئی اور تاخیری حربے

امان اللہ کنرانی کے مطابق پی ٹی آئی تاخیری حربے استعمال کرنا چاہتی تھی۔ '' توشہ خانہ مقدمے میں بھی ان کے وکیل وقت پر حاضر نہیں ہوتے تھے اور یہاں بھی انہوں نے یہی کوشش کی۔ تو عدالت نے اپنی قانونی ذمہ داری پوری کرتے ہوئے وکیل دفاع کا تقرر کیا۔‘‘

فیصلہ منتخب نمائندوں کے لیے خطرہ

قانونی پیچیدگیوں سے دور انسانی حقوق کے کارکنان اور کچھ سیاست دان اس خدشے کا اظہار کر رہے ہیں کہ اس فیصلے کے منتخب وزرائے اعظم پر منفی اثرات پڑ سکتے ہیں۔ ہیومن رائٹس کمیشن آف پاکستان کے چیئر مین اسد بٹ کا کہنا ہے کہ یہ فیصلہ سیاست دانوں کے لیے خطرے کی گھنٹی ہے۔ انہوں نے ڈی ڈبلیو کو بتایا، ''اس فیصلے سے پاکستان کی اسٹیبلشمنٹ نے ثابت کر دیا ہے کہ اسی کے پاس طاقت اور اختیار ہے اور وہ جب چاہے، جسے چاہے کسی بھی طریقے سے نہ صرف یہ کہ اقتدار سے نکال سکتی ہے بلکہ سزا دے کر ان کے سیاسی مستقبل کو بھی ختم کر سکتی ہے۔‘‘

اسد بٹ کے مطابق اس فیصلے کے بعد طاقتور حلقوں کو کسی بھی  وزیراعظم کو سزا دے کر نااہل کروانے کا ایک اور بہانہ مل جائے گا۔

قومی اسمبلی کی ایک سابق خاتون رکن نے نام نہ ظاہر کرنے کی شرط پر ڈی ڈبلیو کو بتایا، ''منتخب وزرائے اعظم کے سروں پر پہلے ہی غیر یقینی کیفیت کی تلوار لٹک رہی ہوتی ہے۔ اب اسٹیبلشمنٹ اس فیصلے کو عدالتی نظیر کے طور پر منتخب نمائندوں کے خلاف استعمال کرے گی اور غیر یقینی صورت حال میں مزید اضافہ ہوگا۔‘‘