اسرائیلی وزیر اعظم کا دورہ برلن

اسرائیلی وزیر اعظم بنجمن نیتن یاہو کا آج جمعرات سولہ مارچ کو برلن میں جرمن چانسلر اولاف شولس نے استقبال کیا۔ دونوں سیاست دان سب سے پہلے گرونے والڈ ٹرین اسٹیشن پر ہولوکاسٹ کی ایک یادگار پر ملے۔

اس کے بعد چانسلردفتر میں ایک مشترکہ ظہرانے اور پریس کانفرنس کا انعقاد ہوا۔ نیتن یاہو بعد ازاں قصر بیلیویو میں وفاقی جرمن صدر فرانک والٹر اشٹائن مائیر سے ملاقات کریں گے۔ اس دورے کے موقع پر برلن میں اسرائیلمیں طے شدہ عدالتی اصلاحات  کے خلاف کئی مظاہرے بھی منعقد کیے گئے۔  ناقدین نیتن یاہو پر اپنے مک مں جمہوریی اقدار کو محدود کرنے کا الزام لگا رہے ہیں۔

برلن میں گرونے والڈ ٹرین اسٹیشن کے پلیٹ فارم 17 پر ہولوکاسٹ کی یادگار کے دورے کے دوران نیتن یاہو نے ایک بیان میں کہا،''ہم نے جو اہم ترین سبق سیکھا ہے، وہ یہ ہے کہ جب آپ کو اس قسم کی بدی کا سامنا ہو تو اُسے بالکال ابتدائی طور پر ہی روکنے کی کوشش کرنی چاہیے۔ ‘‘ نیتن یاہو کا مزید کہنا تھا،'' اب اسرائیلی ریاست اور لاکھوں یہودیوں کی تباہی کے  دیگر خدشات پیش نظر ہیں۔‘‘

نیتن یاہونے جرمنی کے ساتھ اسرائیل کی قابل اعتماد شراکت داری پر بھی زور دیا اور جرمن چانسلر اولاف شوُلس کی مہمان نوازی اور جرمن حکومت کی طرف سے کیے گئے استقبال کے لیے شکریہ ادا کیا۔ نیتن یاہو  کے بقول،''اسرائیل ان لوگوں کی دوستی کا خیرمقدم کرتا ہے، جو اس کی اقدار اور خدشات میں شریک ہوتے ہیں۔‘‘

جرمن جانسلر اولاف شُولس نے کہا کہ جرمنی کو اپنی تاریخ نہیں بھولنی چاہیے۔ ہولوکاسٹ کے واقعے کا ازالہ بھی جرمنی کی ذمہ داری  ہے۔  جرمنی کے اسرائیل کے ساتھ  قریبی تعلقات ہیں اور وہ اسرائیلی ریاست کے دفاع می ذمہ داری کا حصہ دار ہے۔

نیتن یاہو اور شولس نے مشترکہ پریس کانفرنس سے خطاب بھی کیا۔ جرمن اخبار برلنر سائٹونگ کے مطابق اسرائیلی وزیر اعظم کے برلن کے دورے کے موقع پر وفاقی جرمن پارلیمان کی عمارت کے باہر سینکڑوں افراد، جن میں بڑی تعداد ایسے اسرائیلی باشندوں کی بھی ہے، جو جرمنی میں آباد ہیں، نے نیتن یاہو حکومت کی سیاسی اصلاحات کی پالیسی کے خلاف احتجاجی مظارہ کیا۔

جرمن دارالحکومت برلن میں اسرائیلی وزیر اعظم کے دورے کے موقع پر سکیورٹی کے خاص انتظامات کیے گئے ہیں۔

 چار ہزار پولیس اہلکار نیتن یاہو کے برلن کے دورے کو بُر امن اور بغیر کسی ہنگامہ آرائی کے تکمیل تک پہنچانے کے لیے تعینات کیے  گئے ہیں۔ اسرائیلی  وزیر اعظمآج رات برلن کے مشہور ہوٹل والڈوف اسٹوریا میں قیام کریں گے۔ یہ ہوٹل مغربی برلن کے ایک پوش علاقے میں واقع ہے۔ اس ہوٹل کے ارد گرد  کافی دور تک کے علاقوں کو  مکمل طور پر سکیورٹی حکام نے بند کر رکھا ہے اور وہاں سخت حفاظتی پہرہ ہے۔

پولیس کی اطلاعات کے مطابق شام تک برلن میں حالات پُر امن رہے اور کوئی ناخوشگوار واقعہ پیش نہیں آیا۔

ک م/ ش ر (ڈی پی اے، برلینر سائٹنگ)