سعودی عرب: اسرائيل کے ساتھ سفارتی تعلقات پر بات چيت معطل

مشرق وسطیٰ ميں حاليہ کشيدگی کے تناظر ميں سعودی حکومت نے اسرائيل کے ساتھ سفارتی تعلقات کی بحالی کے ليے جاری مذاکراتی عمل غير معينہ مدت تک کے ليے معطل کر ديا ہے۔ جرمن خبر رساں ادارے ڈی پی اے نے سعودی دارالحکومت رياض سے سفارتی ذرائع کا حوالہ ديتے ہوئے يہ انکشاف ہفتہ چودہ اکتوبر کو کيا۔ يہ مذاکراتی عمل امريکا کی ثالثی ميں جاری تھا، اسی ليے ذرائع نے تصديق کی کہ غزہ پٹی ميں اسرائيلی فضائيہ کی کارروائی کے بعد فی الحال بات چيت کا عمل معطل ہے۔

شدت پسند تنظيم حماس نے قريب ايک ہفتہ قبل اسرائيلی علاقوں پر وسيع تر بمباری کی۔ حماس کے اس حملے ميں 1,300 سے زائد اسرائيلی شہری مارے گئے جب کہ کئی کو اغواء کر ليا گيا۔ اس کے رد عمل ميں اسرائيلی دفاعی افواج نے غزہ پٹی ميں حماس کے ٹھکانوں کو نشانہ بنانے کا عمل جاری رکھا ہوا ہے۔ جوابی کارروائيوں ميں ہفتے تک 2,200 سے زائد فلسطينی ہلاک ہو چکے ہيں۔

اسرئیلی ڈیڈ لائن: غزہ میں لاکھوں افراد کی نقل مکانی جاری

غزہ کے باشندے اپنی سرزمین پر ہی رہیں، مصری صدر السیسی

اسرائیل اور حماس میں لڑائی جاری، تقریباً ڈھائی ہزار افراد ہلاک

جمعے کو اسرائيلی دفاعی افواج نے شمالی غزہ سے تقريباً ايک ملين فلسطينيوں کو نقل مکانی کے احکامات جاری کيے۔ اسرائيل ممکنہ طور پر اس علاقے ميں حماس کے خلاف زمينی کارروائی کی تياری ميں ہے اور اسی تناظر ميں انسانی بحران سے بچنے کے لیے مقامی آبادی کو نقل مکانی کا کہا گيا ہے۔ البتہ عالمی برادری کا کہنا ہے کہ غزہ ميں اتنی بڑی تعداد ميں افراد کی اتنی جلدی نقل مکانی انسانی بحران کو جنم دے سکتی ہے۔

رياض حکومت نے جمعے کی شب ہی اس نقل مکانی کو مسترد کر ديا تھا اور اسی کے بعد مذاکراتی عمل کی تعطلی کا فيصلہ سامنے آيا۔

امريکی وزير خارجہ سعودی عرب ميں

رياض حکومت کی جانب سے مذاکرات کی معطلی کی خبر ايک ايسے موقع پر سامنے آئی جب امريکی وزير خارجہ انٹونی بلنکن سعودی عرب کے دورے پر ہيں۔ بلنکن دراصل علاقائی ممالک کا دورہ کر رہے ہيں تاکہ اسرائيل اور حماس کے جنگجوؤں کے مابين لڑائی پر تبادلہ خيال کيا جا سکے۔

دو سال قبل تک مصر اور اردن دو واحد عرب ممالک تھے، جنہوں نے اسرائيل کو تسليم کرتے ہوئے اس کے ساتھ سفارتی تعلقات قائم کيے۔ پھر امريکا کی ثالثی ميں بحرين اور متحدہ عرب امارات نے بھی ستمبر سن 2020 ميں اسرائيل کے ساتھ سفارتی تعلقات کی ڈيل کو حتمی شکل دی۔ بعد ازاں مراکش اور سوڈان نے بھی اس ضمن ميں اقدامات کيے۔

پچھلے ماہ ہی سعودی ولی عہد شہزادہ محمد بن سلمان نے عنديہ ديا تھا کہ اسرائيل کے ساتھ تعلقات کے قيام کا معاملہ آگے بڑھ رہا ہے۔ البتہ تازہ پيش رفت کے بعد صورتحال واضح نہيں۔

ع س / ش خ، ر ب (ڈی پی اے)