سعودی عرب: ایک اور پاکستانی کا سر قلم، مجموعی تعداد نوّے

سعودی دارالحکومت ریاض سے موصولہ نیوز ایجنسی اے ایف پی کی رپورٹوں کے مطابق خلیج کی اس عرب ریاست میں کسی مجرم کو سنائی گئی سزائے موت پر عمل درآمد کے اس تازہ ترین واقعے سے اقوام متحدہ کے ایک اعلٰی اہلکار کے اس موقف کو مزید تقویت ملتی ہے کہ اس عرب بادشاہت میں مجرموں کے سر قلم کیے جانے کے رجحان میں اضافہ ’انتہائی پریشان کن‘ امر ہے۔

اے ایف پی نے سعودی عرب کی سرکاری پریس ایجنسی کے جاری کردہ سعودی وزارت داخلہ کے ایک بیان کا حوالہ دیتے ہوئے لکھا ہے کہ جس پاکستانی شہری کا سر آج ریاض میں قلم کیا گیا، اس پر ہیروئن کی اسمگلنگ کا جرم ثابت ہو گیا تھا۔

اس پاکستانی مجرم کا نام احسان امین بتایا گیا ہے اور وہ اس سال کے دوران اب تک ایسی سزا پانے والا 90 واں مجرم تھا۔ اے ایف پی کی رپورٹوں کے مطابق سعودی عرب میں مجرموں کے سر قلم کیے جانے کا رجحان اتنا زیادہ ہو گیا ہے کہ 2014ء میں پورے سال کے دوران وہاں 87 مجرموں کے سر قلم کیے گئے تھے لیکن اس سال کے پہلے پانچ ماہ کے دوران یہی تعداد اب تک 90 ہو چکی ہے۔ ان نوّے مجرموں میں سے قریب نصف غیر ملکی شہری تھے اور باقی مقامی سعودی باشندے۔

بہت تیز رفتار عدالتی کارروائیوں کے بعد سزاؤں، اندھا دھند فیصلوں یا پھر ماروائے عدالت ہلاکتوں کے واقعات پر نظر رکھنے والے اقوام متحدہ کے خصوصی اہلکار کرسٹوف ہائنس نے ابھی کل بدھ کے روز ہی اے ایف پی کے ساتھ ایک انٹرویو میں کہا تھا کہ دنیا کے بہت سے ملکوں میں مجرموں کو سزائے موت سنانے یا اس پر عملدرآمد کے واقعات میں کمی ہو رہی ہے لیکن سعودی عرب اس عالمی رجحان کے بالکل برعکس ایک ایسا ملک ہے جہاں مجرموں کے سر قلم کیے جانے کے واقعات میں مسلسل اضافہ ہو رہا ہے۔

سعودی عرب ایک انتہائی قدامت پسند مسلم بادشاہت ہے، جہاں سخت شرعی قوانین نافذ ہیں اور منشیات کی اسمگلنگ، جنسی زیادتی، قتل، مسلح ڈکیتی اور توہین مذہب ایسے جرائم ہیں، جن کے مرتکب افراد کو بنیادی طور پر سزائے موت سنا دی جاتی ہے۔

سعودی وزارت داخلہ کے مطابق ایسے جرائم کے مرتکب افراد کے عوامی سطح پر سر قلم کیے جانا انصاف کی خاطر ایسا ریاستی اقدام ہے، جو دوسرے لوگوں کو ایسے جرائم کے ارتکاب سے باز رکھنے میں اہم کردار ادا کرتا ہے۔