سعودی عرب نے اخوان المسلمون کو ’دہشت گرد‘ گروہ قرار دے ديا

سعودی عرب کی وزارت داخلہ کی جانب سے جمعہ سات مارچ کے روز جاری کردہ ايک بيان کے مطابق شاہ عبداللہ نے دہشت گرد گروہوں کی شناخت کے ليے قائم کردہ کميٹی کی رپورٹ کے نتائج کی توثيق کرتے ہوئے نيا حکم نامہ جاری کر ديا ہے۔ اِس شاہی حکم نامے کے تحت بيرون ملک مسلح تنازعات ميں حصہ لينے والوں اور دہشت گرد قرار ديے جانے والے گروہوں کے ساتھ روابط رکھنے والوں کو سزا کا حقدار قرار ديا گيا ہے۔ انسداد دہشت گردی کے اِس نئے قانون کے تحت شدت پسند گروہوں کے اجتماعات کو بھی ممنوع قرار دے ديا گيا ہے، خواہ وہ سعودی سرزمين پر ہوں يا بيرون ملک۔

نيوز ايجنسی ايسوسی ايٹڈ پريس کے مطابق اِس پيش رفت کے تناظر ميں سعودی حکام نے دارالحکومت رياض ميں جاری کتابوں کے ميلے ميں اخوان المسلمون کی تمام اشاعتوں پر بھی پابندی عائد کردی ہے جبکہ اِس اسلام پسند جماعت کے حامی ملک قطر سے اپنے سفير کو بھی واپس بلا ليا ہے۔

رياض حکومت کے اِس اقدام پر کڑی تنقيد کرتے ہوئے اخوان المسلمون نے اِس کی مذمت کی ہے۔ دوسری جانب مصر کی وزارت خارجہ نے اِس اقدام کو سراہتے ہوئے کہا ہے کہ اِس سے دونوں ممالک کے مابين پائی جانے والی يکجہتی اور تعاون کا ثبوت ملتا ہے۔

مصر ميں تازہ فسادات

دريں اثناء مصر کے مختلف حصوں ميں جمعے کے روز رونما ہونے والے تازہ فسادات ميں کم از کم تين افراد ہلاک اور درجنوں زخمی ہو گئے ہيں۔ سکيورٹی ذرائع کے مطابق دو افراد قاہرہ کے الف مسکين نامی علاقے جبکہ ايک شخص ابيسيا ميں ہلاک ہوا۔ ملکی وزارت صحت کے مطابق ملک کے کئی حصوں ميں پھوٹنے والے فسادات ميں اڑتاليس افراد زخمی ہوئے ہيں۔ اِن فسادات کا آغاز جمعے کی نماز کے بعد اخوان المسلمون کے حاميوں اور پوليس کے مابين تصادم سے ہوا۔ قاہرہ سے مصری وزارت داخلہ نے بتايا کہ سينتاليس افراد کو زير حراست بھی لے ليا گيا ہے، جو اخوان المسلمون کے حامی ہيں۔

مظاہرين کے خلاف کارروائی پر اقوام متحدہ کی مذمت

مصر ميں مظاہرين کے خلاف طاقت کے استعمال پر جمعے کے روز پہلی مرتبہ اقوام متحدہ کی جانب سے اِس عمل کی مذمت کی گئی۔ عالمی تنظيم کی ستائيس رکنی ہيومن رائٹس کونسل نے قاہرہ حکومت کی جانب سے اپوزيشن مظاہرين کے خلاف وسيع تر کريک ڈاؤن پر تنقيد کی ہے۔ کونسل کی جانب سے مطالبہ کيا گيا ہے کہ حکومت کو پچھلے چند مہينوں کے دوران اٹھائے جانے والے اقدامات کا جواب دينا ہوگا اور اِس سلسلے ميں کروائی جانے والی تحقيقات کے نتائج کو بھی سامنے لانا ہوگا۔

مصر ميں گزشتہ برس جولائی ميں اخوان المسلمون سے تعلق رکھنے والے محمد مرسی کو صدر کے عہدے سے ہٹاتے ہوئے معزول کر ديا گيا تھا، جِس کے بعد اِس اسلام پسند جماعت کے حاميوں کی جانب سے ملک گير احتجاج کا سلسلہ شروع ہو گيا تھا۔ اسی اثناء ميں قاہرہ کی عبوری حکومت کی جانب سے پارٹی کے خلاف کريک ڈاؤن بھی شروع کيا گيا، جِس ميں درجنوں افراد ہلاک ہوئے۔