سمندروں میں تیل کی آلودگی سے نمٹنے کی مشقیں

یہ سہ روزہ مشقیں 28 سے لے کر 30 اگست تک فن لینڈ کے دارالحکومت ہیلسنکی کے قریب بحیرہء بالٹک میں Balex Delta کے نام سے منعقد ہوئیں۔

ان میں شریک جہازوں میں جرمنی کا Arkona نامی جہاز بھی تھا، جس کے اندر سے دائیں بائیں دونوں جانب بڑے بڑے دھاتی تختے باہر نکلتے تھے، جو پانی کی سطح کو چھوتے تھے۔ ان تختوں کے بارے میں وضاحت کرتے ہوئے فن لینڈ کے سرحدی تحفظ کے محکمے سے وابستہ ماہر Tom Lundell نے بتایا:’’ان دھاتی بازوؤں کا مقصد پانی پر سے تیل کو جذب کرنا ہے۔ ان تختوں کے نیچے متحرک برش لگے ہوئے ہیں، جو پانی کی سطح پر پھیلے تیل کو جمع کرتے ہیں اور جہاز کے اندر بنی ٹینکیوں تک پہنچاتے ہیں۔ اس تیل کو بعد ازاں خشکی پر لے جا کر ٹھکانے لگایا جاتا ہے۔‘‘

مشقوں میں شریک جہازوں کا مقصد مشقوں سے دو روز پہلے ہیلسنکی اور ٹالین کے درمیان پیش آنے والے ایک فرضی حادثے کے بعد سمندر میں تیل کی آلودگی کو پھیلنے سے روکنا تھا۔ اس فرضی حادثے کے مطابق ایک بڑا آئل ٹینکر ایک بحری جہاز سے ٹکرا جاتا ہے اور تقریباً پندرہ ہزار ٹن خام تیل بہہ کر سمندری پانی میں شامل ہو جاتا ہے۔ تیل کی یہ تہ سیدھی فن لینڈ کے ساحل کی طرف بڑھ رہی ہے اور مشقوں میں شریک جہازوں کا مقصد اس تیل کو جمع کرتے ہوئے سمندر کو آلودگی سے بچانا ہے۔ تاہم سمندر کو ذرا سی بھی آلودگی سے بچانے کے لیے ان مشقوں میں اصل تیل نہیں بلکہ ایک خاص طرح کی گھاس کی معمولی مقدار استعمال کی گئی تھی۔

ماہرین کے مطابق اس طرح کے حادثات کے امکانات درحقیقت بڑھ گئے ہیں کیونکہ اب تیل کی نقل و حمل کے لیے زیادہ سے زیادہ بڑے ٹینکر بھی استعمال کیے جانے لگے ہیں اور بحیرہء بالٹک سے ہی سالانہ بیس ہزار آئل ٹینکر تیل لے کر گزرتے ہیں۔

ان مشقوں میں شامل کچھ جہازوں کو سمندر میں ایسی رکاوٹیں پھیلانے کے لیے استعمال کیا گیا، جن کا کام پانی کی سطح پر تیرتے تیل کو آگے بڑھنے سے روکنا ہوتا ہے۔ ان مشقوں کے موقع پر ہیلسنکی یونیورسٹی کے ماہی گیری پر تحقیق کے پروفیسر ساکاری کوئیکا جیسے ماہرین بھی موجود تھے، جن کی ٹیم کا تیارکر دہ سافٹ ویئر سمندر میں بہ جانے والے تیل کے پھیلنے کی سمت اور رفتار وغیرہ کے بارے میں پیشین گوئی کر سکتا ہے۔ انہوں نے بتایا:’’تیل کی آلودگی کی صورت میں ہم تازہ موسمیاتی پیشین گوئی کی مدد سے یہ بتا سکتے ہیں کہ تیل کی تہ ممکنہ طور پر کس سمت کا رُخ کرے گی۔ ایسا کرتے ہوئے ہمارا سافٹ ویئر پروگرام اُن ساحلی علاقوں کو خاص طور پر پیشِ نظر رکھتا ہے، جن میں بقا کے خطرے سے دوچار انواع کا بسیرا ہوتا ہے۔‘‘

ان مشقوں سے یہ بات ایک بار پھر واضح ہو کر سامنے آئی کہ ایسی کسی بھی صورتِ حال میں تیل کی تہ سے نمٹنے والے مختلف جہازوں کے درمیان رابطہ کاری سب سے بڑا چیلنج ہوتی ہے۔ یہ مشقیں پروگرام کے مطابق اور بغیر کسی بھی غیر متوقع واقعے کے انجام کو پہنچیں، اس لیے بھی کہ ان تین دنوں کے دوران موسم خوشگوار اور سمندر پُرسکون رہا۔ کوئی ایک درجن مختلف محکموں کے تعاون سے عمل میں آنے والی ان مشقوں میں دو ہیلی کاپٹروں کی بھی مدد لی گئی تھی۔

F.Grotelüschen/aa/km