شمالی قبرص میں ’بھوتوں کا شہر‘ کھولنے پر تشویش

ترکی نے اپنے زیر اثر شمالی قبرص کے ساحلی علاقے وروشا کو جمعرات سے کھول دیا ہے تاہم اس فیصلے پر مقامی اور بین الاقوامی سطح پر تشویش کا اظہار کیا جا رہا ہے۔ شمالی قبرص میں انتخابات سے عین قبل اس ساحل سمندر کو کھولنے کا فیصلہ کیا گیا ہے۔ قبرص شمالی اور جنوبی دو حصوں میں تقسیم ہے اور اس علاقے کے تعلق سے ترکی اور جنوبی قبرص کے درمیان برسوں سے تنازع رہا ہے۔

جنوبی قبرص والے علاقے کے صدر نکوس انیستیسیادست کا کہنا ہے کہ یہ فیصلہ تمام عالمی قوانین اور اقوام متحدہ کی سکیورٹی کونسل کی قرار دادوں کی صریحاًخلاف ورزی ہے۔ قبرص کے قریبی حلیف یونان نے متنبہ کرتے ہوئے کہا کہ اس معاملے کو یورپی یونین کے ساتھ اٹھایا جائے گا۔

کھوئی ہوئی زمین

سن 1974میں جب ترکی نے قبرص پر حملہ کیا تھا اسی وقت سے وروشا کا ساحلی شہر ویران پڑا ہے۔  یہ جزیرہ اسی وقت نسلی بنیادوں پر تقسیم ہوگیا تھا۔ حملے کے چار برس قبل تک اس کا ساحل چہل پہل سے آباد رہتا تھا لیکن آج تناور درختوں اور بلند عمارتوں والے ساحل سمندر کا یہ علاقہ بھوتوں کا شہر دکھائی دیتا ہے۔

ترکی کے اثر و رسوخ والے قبرص کے لوگوں نے اس فیصلے کا خیر مقدم کیا ہے جبکہ جنوبی خطے کے لوگوں نے اس کے خلاف احتجاجی جلوس نکالا۔ ماضی میں اسی علاقے کے رہنے والے جنوبی قبرص کے ایک شخص کریا کوس کا کہنا تھا کہ ''گر چہ مجھے اس کی توقع تھی تاہم اس مانوس مقام کو دیکھتے ہوئے مجھے حیرت بھی ہوئی۔ یہ ایک ایسا دکھ ہے جس کا کوئی مداوا نہیں ہوسکتا۔ وروشا پوری طرح سے کھو چکا ہے۔''

علاقے پر ترک قبرص فوجیوں کا کنٹرول ہے اور اس علاقے میں انتخابات سے محض چند روز پہلے اسے کھولا گیا ہے۔ ان انتخابات میں کامیاب ہونے والا رہنما ہی اقوام متحدہ کی ثالثی میں ہونے والی امن بات چیت میں خطے کی نمائندگی کرے گا۔ بعض حلقوں کا کہنا ہے کہ اسے کھولنے سے وزیر اعظم ارسن تاتار کو انتخابات میں فائدہ ہوسکتا ہے جنہوں نے ترک صدر طیب اردوان سے صلاح و مشورے کے بعد یہ فیصلہ کیا ہے۔ 

لیکن یہاں کے دوسرے رہنما اکنچی نے اس فیصلے پر یہ کہہ کر نکتہ چینی کی ہے کہ اس کا مقصد ایک خاص امیدوار کے حق میں فضا کو ہموار کرنا ہے۔ انہوں نے کہا کہ اس سے ''خطے کے لوگ عالمی سطح پر مزید مشکل صورت حال میں پھنس سکتے ہیں۔''

اکنچی کے تعلقات ترکی سے اچھے نہیں ہیں تاہم عالمی سطح پر ان کے روابط بہتر ہیں اور ان کی گرفت بھی مضبوط ہے۔ گرچہ شمالی قبرص کا شمار ترکی کے ایک صوبے کے طور پر ہوتا ہے تاہم کسی حد تک یہ خود مختار علاقہ ہے۔ بحیرہ روم میں واقع اس جزیرے کی سن 1974 میں تقسیم کے بعد ترکی نے اسی ہفتے اسے کھولنے کا اعلان کیا تھا۔ لیکن متنازعہ خطے کے سبب یورپی یونین اور ترکی میں اس حوالے سے ایک بار پھر رسہ کشی

 کاخدشہ ہے۔

ص ز / ج ا (اے پی، اے ایف پی)