شمالی کوریا ، کم یو جونگ اپنے بھائی کی ممکنہ جانشیں

اپریل کی گیارہ تاریخ کو ہونے والے ورکرز پارٹی کے اجلاس میں کم جونگ اُن کو آخری مرتبہ دیکھا گیا تھا۔ منظرعام سے غائب ہونے کی وجہ سے اُن کے حوالے سے افواہیں گردش کر رہی ہیں۔ کم جونگ اُن اپنے دادا کم السونگ کی پندرہ اپریل کو منائی جانے والی سالگرہ کی تقریبات میں بھی شریک نہیں ہوئے تھے۔ سونگ شمالی کوریا کے بانی ہیں اور ان کی سالگرہ اس ملک میں منائی جانے والی ایک اہم ترین تقریب ہوتی ہے۔

ذرائع ابلاغ خفیہ اطلاعات اورپیونگ یانگ کی ناقد برادریوں کا کہنا ہے کہ دل کے ایک آپریشن کے بعد سینتیس سالہ کم کی حالت انتہائی نازک ہے۔ اس صورتحال میں کم کے ممکنہ جانشیں کے بارے میں بھی قیاس آرائیاں کی جا رہی ہیں۔

سیول کے سیجونگ انسٹیٹیوٹ کے لی سیئونگ نے ڈی ڈبلیو کو بتایا،'' اس بارے میں کوئی شفافیت موجود نہیں ہے کہ شمالی کوریا کا اگلا رہنما کون ہو گا۔ اس بارے میں غیر یقینی پائی جاتی ہے۔‘‘

شمالی کوریا کی حکومت قانونی طور پر ایک طرح سے کم خاندان سے جڑی ہوئی ہے۔ کم جونگ ان کے حصے میں اپنے ملک کی باگ ڈور 2011ء میں اُن کے والد کم جونگ ال کے انتقال کے بعد آئی تھی۔ کم جونگ ال 1994ء میں اپنے والد کم السونگ کے مرنے کے بعد شمالی کوریا کے سربراہ بننے تھے۔

تجزیہ کار کہتے ہیں کہ کم کو اگر کچھ ہوتا ہے تو ان کی بہن' کم یو جونگ‘ جانشیں کے حوالے سے بہترین انت‍خاب ہو سکتی ہیں۔

کوریائی مبصرین کا کہنا ہے کہ یہ دونوں بہن اور بھائی ایک دوسرے سے بہت ہی قریب ہیں اور ان دونوں نے 1990ء کی دہائی کے آخری سال سوئٹزرلینڈ میں ایک ساتھ گزارے ہیں۔ سیول کی یونسی یونیورسٹی کے بونگینگ شک نے ڈی ڈبلیو کو بتایا، ''کم جونگ ان اور کم یو جونگ نے بہت ساری چیزیں ایک ساتھ کی ہیں اور شمالی کوریا واپس آنے کے بعد بھی ان دونوں کے رشتے میں پہلے جیسی قربت برقرار رہی۔‘‘

کم یو جونگ کون ہیں؟

اکتوبر2017ء میں کم جونگ اُن نے اپنی بہن کو اپنی آنٹی 'کم کیونگ ہی‘ کی جگہ ملک کے اہم ترین پولٹ بیورو کا متبادل رکن بنا دیا تھا۔ کم جونگ ال جب تک حیات تھے تب بھی 'کم کیونگ ہی‘ ایک بہت ہی با ا‍ختیار شخصیت سمجھی جاتی ہیں۔

جنوری2017 ء میں امریکی محکمہ خزانہ نے اس وقت 28 سالہ کم یو جونگ اور کئی دیگر شمالی کوریائی عہدیداروں پر انسانی ‍حقوق کی خلاف ورزیوں کے الزام میں پابندیاں عائد کر دی تھیں۔ ایک اور ماہر مشائیل مادین نے ڈی ڈبلیو کو دیےگئے اپنے ایک سابقہ انٹرویو میں  کم یو جونگ کو اپنے بھائی کا قابل بھروسہ ہمراز قرار دیا تھا۔

کم جونگ ال کے سات بچوں میں کم یو جونگ سب سے چھوٹی ہیں۔ کم جونگ اُن اور کم یو جونگ کو ابتدائی طور پر گھر پر پڑھایا گیا تھا۔ بعدازاں ان دونوں نے سوئس وفاقی شہربیرن کے قریب دو اسکولوں میں تعلیم حاصل کی۔

کم یو جونگ پہلی مرتبہ اس وقت نظروں میں آئیں، جب 2010ء میں انہیں اپنے والد کی سیکرٹری کے ہمراہ دیکھا گیا۔ اس کے بعد وہ مخ‍تلف عہدوں پر فائز رہیں۔ بتایا جاتا ہے کہ ان کی شادی چوئے سونگ سے ہوئی ہے، جو چوئے روینگ ہے کے صاحبزادے ہیں۔ چوئے روینگ ہے کو بھی شمالی کوریا کے ایک ممکنہ سربراہ کے طور پر دیکھا جاتا ہے۔

فرینک اسمتھ (ع ا / ک م)