طاہر القادری نے بھی مارچ کی دھمکی دے دی

پاکستان کے عوامیت پسند مذہبی رہنما طاہر القادری نے الزام عائد کیا ہے کہ پولیس ان کی عوامی تحریک کے پانچ سو ارکان کو گرفتار کر چکی ہے۔ انہوں نے ان گرفتاریوں کو ڈرانے اور دھمکانے کی پالیسی قرار دیتے ہوئے خبردار کیا ہے کہ اگر یہ سلسلہ روکا نہ گیا تو وہ عوام سے انقلاب لانے کی اپیل کر دیں گے۔

پاکستان عوامی تحریک کی طرف سے جاری کیے گئے ایک بیان میں طاہر القادری کی طرف سے کہا گیا ہے کہ اگر ان کے حامیوں کو ڈرانے دھمکانے کا سلسلہ جاری رہتا ہے اور گرفتاریوں کا عمل نہیں رکتا، تو ان کے پاس اس کے علاوہ کوئی چارہ نہیں ہو گا کہ وہ عوام کو ملکی اور صوبائی دارالحکومتوں کی طرف مارچ کرنے کی حتمی اپیل کر دیں تاکہ موجودہ حکومت کا تختہ الٹا جا سکے۔

جمعرات کے روز صوبہ پنجاب کے دارالحکومت لاہور میں ایک پریس کانفرنس کے دوران قادری نے کہا کہ اگست کے اختتام سے قبل ہی نوازشریف کی حکومت ختم ہو جائے گی۔ طاہر القادری نے اپنے حامیوں سے کہہ رکھا ہے کہ وہ جون میں لاہور میں رونما ہونے والے سیاسی تشدد کے نتیجے میں ہلاک ہونے والے چودہ افراد کے لیے دس اگست کے روز ’اجتماعی دعا‘ میں شرکت کریں۔ تاہم یہ واضح نہیں ہے کہ آیا وہ اسی دن ہی عوامی مارچ کا ارادہ رکھتے ہیں۔ کہا جا رہا ہے کہ پولیس نے سکیورٹی وجوہات کی بنا پر اس اجتماعی دعا کو ناکام بنانے کے لیے منصوبہ بنا رکھا ہے۔

طاہر القادری نے دعویٰ کیا ہے کہ نواز شریف کو علم ہے کہ ان کی حکومت گرنے والی ہے، اس لیے انہوں نے اپنے کنبے کے ساتھ امریکا منتقل ہونے کا منصوبہ بنا لیا ہے۔ قادری کے بقول ان کے پاس ایسے شواہد ہیں کہ وہ ثابت کر سکتے ہیں کہ نواز شریف اپنے گھر والوں اور ملازمین کے لیے امریکی ویزوں کی درخواست جمع کرا چکے ہیں۔ انہوں نے یہ بھی کہا کہ اس مرتبہ سعودی عرب نواز شریف کو سیاسی پناہ دینے کے لیے تیار نہیں ہے۔

ادھر پنجاب کے وزیر قانون رانا مشہود نے جمعرات کے دن تصدیق کی کہ قادری کے متعدد حامیوں کو گرفتار کیا جا چکا ہے۔ انہوں نے کہا، ’’بدھ سے لے کر اب تک پنجاب کے مختلف شہروں سے مجموعی طور پر بتیس افراد کو قانون کی خلاف ورزی کرنے پر گرفتار کیا گیا ہے۔‘‘ انہوں نے خبردار کیا ہے کہ صوبائی حکومت قانون کو اپنے ہاتھ میں لینے والوں کے خلاف سخت کارروائی کرے گی۔

طاہر القادری کی طرف سے حکومت کو یہ نئی دھمکی ایسے وقت سامنے آئی ہے، جب پاکستان تحریک انصاف کے رہنما عمران خان بھی نواز شریف کو اقتدار سے الگ کرنے کے لیے اپنی مہم چلا رہے ہیں۔ 2013ء کے الیکشن میں دھاندلی کے الزامات عائد کرنے والے عمران خان نے پاکستان کے یوم آزادی پر اسلام آباد میں ایک بڑی ریلی منعقد کرنے کا اعلان کر رکھا ہے۔ اس ریلی کا مقصد قبل از وقت انتخابات کے لیے حکومت پر دباؤ ڈالنا ہے۔