بنگلہ دیش میں انٹرنیٹ سروس بند

خطرناک ڈرائیونگ کے تناظر میں دو طالب علموں کی ہلاکت کے بعد بنگلہ دیش میں طلبہ کی جانب سے مظاہروں کا آغاز ہو گیا تھا۔ ایک ہفتے قبل ان طلبہ کی ہلاکت ایک تیز رفتار بس کے نیچے آ کر ہوئی تھی۔ طلبہ مظاہرین کا مطالبہ ہے کہ خطرناک ڈرائیونگ کے مسئلے پر قابو پایا جائے۔

اقوام متحدہ اور ورلڈ بینک کے سربراہان کا دورہ بنگلہ دیش

تیرہ سالہ روہنگیا ماں، ایسے بہت سے واقعات ہیں

گزشتہ اتوار سے اب تک بنگلہ دیش میں ہزارہا طلبہ سڑکوں پر ہیں۔ رواں برس ہونے والے عام انتخابات کے تناظر میں ان مظاہروں کو انتہائی حساس معاملہ قرار دیا جا رہا ہے۔

بنگلہ دیشی وزیراعظم شیخ حسینہ واجد نے طلبہ مظاہرین کے غصے کو کم کرنے کے لیے اتوار کے روز اپنے ایک بیان میں کہا، ’’ہماری پولیس فورس نے ملک بھر کی سڑکوں پر گشت شروع کر دیا ہے، تاکہ سڑکوں پر نظم پیدا کیا جائے۔‘‘

طلبہ کے مظاہرے بنگلہ دیش میں شاذونادر ہی نظر آتے ہیں اور شیخ حسینہ واجد کا الزام ہے کہ ان کے سیاسی حریف اس معاملے کو حکومت مخالف جذبات ابھارنے کے لیے استعمال کر رہے ہیں۔ دوسری جانب اپوزیشن جماعت بنگلہ دیش نیشنسلٹ پارٹی نے اس معاملے میں ملوث ہونے سے انکار کیا ہے۔

ادھر امریکی سفارت خانے کی جانب سے ایک بیان میں کہا گیا ہے کہ بنگلہ دیش میں امریکی مندوب مارسیا بیرنیکیٹ کی گاڑی کو مسلح حملہ آور نے نشانہ بنایا۔ بیان میں کہا گیا ہے کہ یہ واقعہ ہفتے کو اس وقت پیش آیا، جب موٹرسائیکل پر سوار مسلح افراد نے امریکی مندوب کی گاڑی پر حملہ کیا۔

بیان میں مزید کہا گیا ہے کہ اس واقعے میں سفیر اور ان کی سکیورٹی ٹیم محفوظ رہے، تاہم ان کے قافلے میں شامل دوگاڑیوں کو ’کچھ نقصان‘ پہنچا۔ پولیس کا کہنا ہے کہ فی الحال ان حملہ آوروں کی شناخت نہیں ہو پائی ہے۔

ع ت، ص ح (اے ایف پی)