عالمی ماحولیاتی کانفرنس میں میتھین کا اخراج بھی موضوع

متحدہ عرب امارات کی امارت دبئی میں اگلے ہفتے سے عالمی ماحولیاتی کانفرنس  ‌COP28 شروع ہو رہی ہے۔ اس عالمی کانفرنس میں میتھین گیس کے اخراج میں کمی سے متعلق گفتگو بھی متوقع ہے۔ خبر رساں ادارے اے ایف پی کے مطابق بین الاقوامی ماحولیاتی مذاکرات میں عموماﹰ گفتگو کاربن ڈائی آکسائیڈ جیسی خطرناک گیس کے اخراج میں کمی پر مرکوز رہتی ہے، تاہم حدت کو جذب کرنے والی میتھین گیس بھی اس بار عالمی ماحولیاتی کانفرنس میں متوقع موضوع ہو گی۔

رواں برس کا اب تک کے گرم ترین سال ہونے کا امکان

'اس برس کا جون ریکارڈ سطح پر اب تک کا گرم ترین تھا'

ماحولیاتی تبدیلیوں کی رفتار کو سست بنانے کے لیے ضرر رساں گیسوں کے اخراج میں کمی کی ضرورت ہے اور ایسے میں میتھین کے اخراج میں کمی اس ہدف تک پہنچنے میں سہولت فراہم کر سکتی ہے۔

یہ بات اہم ہے کہ میتھین گیس CH4 قدرتی گیس کا ایک اہم جزو ہے اور فوسل فیول انفراسٹرکچر سے لیک ہو کر یہ گیس بھاری مقدار میں زمین کے کرہ ہوائی میں شامل ہو رہی ہے۔ اس گیس کو ماحولیاتی تبدیلیوں کا دوسرا سب سے بڑا محرک سمجھا جاتا ہے اور یہ مجموعی طور پر عالمی حدت میں اضافے کے 16 فیصد کی موجب ہے۔ میتھین گیس کرہ ہوائی میں گو کہ فقط دس برس تک رہتی ہے، تاہم کاربن ڈائی آکسائیڈ کے مقابلے میں اس گیس کی حدت کے انجذاب کی خاصیت کہیں زیادہ ہے۔

ماحولیاتی  تبدیلیوں کے خلاف مزید اقدامات کی ضرورت

گرین ہاؤس گیسوں کے اخراج سے متعلق اقوام متحدہ کی سالانہ رپورٹ سے انکشاف ہوا ہے کہ سیاسی اور کاروباری شعبوں کے وعدوں کے باوجود دنیا اب بھی صنعتی دور سے پہلے کے مقابلے  میں حدت میں تقریباً تین ڈگری سینٹی گریڈ اضافے کی طرف بڑھ رہی ہے۔ یہ رپورٹ پیر کو نیروبی میں پیش کی گئی۔ پیرس کے ماحولیاتی معاہدے میں طے کی جانے والی حد یعنی  1.5 ڈگری سے تجاوز نہ کرنے کے لیے، آب و ہوا کو نقصان پہنچانے والی گیسوں کے اخراج کو اگلے چھ سالوں میں کم از کم 28 سے 42 فیصد تک کم کرنا ہو گا۔ یہ فی الحال کی گئی منصوبہ بندی کے مطابق ہے۔ عالمی ماحولیاتی کانفرنس COP28 تیس نومبر کو دبئی میں شروع ہوگی۔ مذکورہ رپورٹ اس سے چند روز پہلے منظر عام پر آئی ہے۔

ع ت / م م (اے ایف پی)