فرانس: ماحولیات کے علم برداروں کا ملک گیر مظاہرہ

فرانس کے مختلف شہروں میں اتوار کو دسیوں ہزاروں مظاہرین نے سڑکوں پر مارچ کیا اور صدر ایمانوئل میکروں سے  عالمی حدت سے نمٹنے سے متعلق مزید اقدمات کا مطالبہ کیا۔ 

یہ مظاہرے ماحولیات سے متعلق مجوزہ نئے قانون کے خلاف کیے گئے جو ماہرین کی نظر میں ناکافی ہے۔

اس احتجاج میں متعدد غیر سرکاری تنظیموں، ٹریڈ یونینوں اور طلبہ کارکنان نے حصہ لیا۔  منتظمین کا کہنا ہے کہ اس کے لیے ملک بھر میں تقریبا 160 پروگرام منعقد کیے گئے جس میں تقریباً سوا لاکھ لوگوں نے حصہ لیا۔ تاہم پولیس کے مطابق احتجاج میں پچاس ہزار سے کم لوگوں نے حصہ لیا۔

پیرس میں "ماحولیات کے قانون = پانچ برس کی مدت میں ناکامی" کے ایک بینر کے تحت بڑی تعداد میں لوگ 'پلیس ڈی لا ریپبلک' کے پاس جمع ہو ئے۔ اس میں شریک ایک کارکن پیٹریکا سامون کا کہنا تھا کہ انہیں میکروں کو دور صدارت سے کافی مایوسی ہو ئی ہے۔ 

ماحولیات پر میکروں کے وعدے

فرانس کی قومی اسبملی ماحولیات سے متعلق حکومت کے بل کو  پہلے ہی منظور کر چکی ہے۔ اس منصوبے میں ان تمام داخلی پروازوں کو بند کرنے کی بات کہی گئی ہے جو ڈھائی گھنٹے  یا اس سے کم دورانیے کی ہوں اور جہاں ٹرین سے سفر کیا جا سکتا ہے۔ اس میں زیادہ توانائی خرچ کرنے والی عمارتوں کی بھی از سر نو مرمت کرنے اور گرین توانائی سے آرستہ کاروں کے استعمال کی حوصلہ افزائی کے لیے اقدامات کرنے کی تجاویز بھی موجود ہیں۔

صدر میکروں نے سن 2017 میں اپنی انتخابی مہم کے دوران  "گرین اصلاحات" پر ریفرنڈم کرنے کا وعدہ کیا تھا۔ تاہم فرانس کے ایک ہفتہ وار جریدے نے اتوار کے روز اطلاع دی ہے کہ اس وعدے کو اب ترک کر دیا گيا ہے۔

فرانسیسی آئین کے مطابق اس طرح کے ریفرنڈم کی منظوری کے لیے پارلیمان کے دونوں ایوانوں کی حمایت ضروری ہے۔ تاہم ایوان بالا یعنی سینیٹ میں کنزرویٹیو جماعت لا ریپبلکنز کی اکثریت ہے اور اس کے ساتھ ماحولیات سے متعلق اصلاحات کو عوام کے سامنے رکھنے کا اب تک کوئی معاہدہ نہیں ہو سکا ہے۔

اس دوران فرانس کے صدر میکروں نے اسٹراس برگ میں اپنے ایک خطاب کے دوران ریفرنڈم نہ کرانے سے متعلق خبروں کو مسترد کرتے ہوئے کہا کہ اسے، "ترک نہیں کیا جائے گا۔"

ماحولیات پر فرانس اور مزید کیا کر رہا ہے؟

فرانس نے کورونا وائرس  کے لیے 122 ارب امریکی ڈالر کے امدادی پیکج کا اعلان کیا ہے۔ اس پیکج میں نقصان دہ گیسوں کا  اخراج کم کرنے اور حیاتیاتی تنوع کے تحفظ میں مدد کے لیے فنڈز رکھے گئے ہیں۔

 سن1990 کی سطح کے مقابلے میں گرین ہاؤس گیسوں کو  2030 تک کم سے کم 55 فیصد تک کم کرنے کے  یوروپی یونین کے  اہداف کو مزید بہتر بنانے کے پیچھے بھی صدر میکروں کا ہی ہاتھ تھا۔  یہ پہلے کے چالیس فیصد ہدف سے کہیں زیادہ ہے۔

گزشتہ ماہ یورپی یوینین نے 2050 تک ماحولیات کے مسائل سے پوری طرح نجات حاصل کرنے کے ایک معاہدے پر اتفاق کیا تھا۔

ص ز/  ش ج  (اے پی، روئٹرز، اے ایف پی)