فرانس میں بچوں پر حملہ، پانچ افراد زخمی

فرانسیسی حکام نے کہا ہے کہ الپائن ٹاؤن انیسی میں چاقو سے مسلح ایک شخص نے ایک چوک پر موجود شہریوں پر حملہ کر دیا، جس کی وجہ سے پانچ افراد زخمی ہو گئے ہیں۔

پولیس نے بتایا ہے کہ زخمی ہونے والوں میں چار بچے بھی شامل ہیں۔ فرانسیسی وزارت دفاع نے اس حملے کی تصدیق کرتے ہوئے بتایا ہے کہ مشتبہ حملہ آور کو گرفتار کر لیا گیا ہے۔

زخمی ہونے والے تمام بچوں کی عمریں تین برس بتائی گئی ہے۔ فرنچ وزیر داخلہ جیرالڈ دارامانن نے اپنے ٹوٍیٹ پیغام میں لکھا کہ سکیورٹی فورسز نے فوری کارروائی کی اور ایک مشتبہ شخص کو حراست میں لے لیا گیا ہے۔

جرمن ٹرین میں حملہ: دہشت گردی کے محرکات نہیں

جنوبی فرانس ميں الجزائری شہری کا پوليس افسران پر چاقو سے حملہ

ایک عینی شاہد نے فرانسیسی خبر رساں ادارے اے ایف پی کو بتایا کہ یہ حملہ جمعرات کی صبح پونے نو بجے شہر کے مرکزی چوک پر کیا گیا۔

اے ایف پی نے ایک سرکاری اہلکار کے حوالے سے بتایا ہے کہ اس حملے میں زخمی ہونے والے دو افراد کی حالت نازک ہے۔ اس اہلکار نے اپنی شناخت مخفی رکھنے کی تاکید کی تھی۔

مقامی ٹی وی چینل بی ایف ایم نے بتایا ہے کہ یہ حملہ بچوں کے ایک پارک میں کیا گیا۔ یہ پارک شہر کے مرکزی چوک کے قریب ہی ہے، جہاں ایک جھیل بھی ہے۔

ملکی وزیر اعظم ایلزابتھ بورن نے کہا ہے کہ وہ زخمیوں کی عیادت کی خاطر انسی روانہ جا رہی ہیں۔ ملکی پارلیمان میں اس حملے کی شدید مذمت کی گئی جبکہ آج کے سیشن میں وہاں زخمیوں سے یک جہتی کے اظہار کے لیے ایک منٹ کی خاموشی بھی اختیار کی۔

ملکی صدر ایمانوئل ماکروں نے بچوں پر کیے گئے اس حملے کی شدید مذمت کی اور اس کارروائی کو ایک بزدلانہ ایکشن قرار دیا ہے۔

ع ب/ ک م (خبر رساں ادارے)