جرمنی کا مائیگریشن پیکج کرسمس سے پہلے منظور ہو جائے گا؟

جرمنی  کی لبرل سیاسی جماعت فری ڈیموکریٹک پارٹی ایف ڈی پی نے جرمن چانسلر اولاف شولس اور وفاقی حکومت کے وزراء پر زور دیا ہے کہ وہ ملک میں مہاجرین اور تارکین وطن کی آمد اور ان کی دیکھ بھال کے حوالے سے تیار کردہ پیکج کے کچھ حصوں کو کرسمس سے پہلے منظور کرائیں اور اس کے جلد نفاذ کو یقینی بنائیں۔

اس بارے میں جرمنی میں وفاقی حکومت اور تمام وفاقی صوبوں کے مابین مہاجرین اور تارکین وطن کی آمد اور ان کی دیکھ بھال پر اٹھنے والے اخراجات کی تقسیم سے متعلق تنازعے میں اتفاق رائے رواں ہفتے ہو گیا تھا ۔ مالی ذمے داریوں کی تقسیم سے متعلق یہ اتفاق رائے کئی ماہ پر محیط اختلاف رائے کے بعد ممکن ہوا۔ اس بارے میں چانسلر اولاف شولس نے بتایا کہ وفاقی حکومت اگلے سال ریاستی حکومتوں اور بلدیاتی انتظامی اداروں کو ہر مہاجر کی دیکھ بھال کے لیے مجموعی طور پر ساڑھے سات ہزار یور و فی کس کی طے شدہ رقم ادا کرے گی۔ یوں 2024ء میں برلن کی طرف سے تمام سولہ وفاقی صوبوں کو کُل تقریباﹰ ساڑھے تین بلین یورو مہیا کیے جائیں گے۔

دریں اثنا حزب اختلاف کے قدامت پسند CDU/CSU بلاک کے رہنما بھی کرسمس سے پہلے اس مائیگریشن پیکج  کی منظوری کا مطالبہ کر رہے ہیں تاکہ اس کا نئے سال 2024ء کے آغاز کے ساتھ ہی نفاذ بھی ممکن ہو سکے۔ فری ڈیموکریٹک پارٹی کے پارلیمانی گروپ کے لیڈر کرسٹیان ڈیُؤر نے جرمن اخبار 'بِلڈ‘ کو اس بارے میں ایک بیان دیا، جس پر مبنی ایک مضمون جمعرات کے روز شائع ہوا، جس میں ان کا کہنا تھا، ''میرے خیال میں وفاقی پارلمیان سے اس پیکج کی منظوری کرسمس سے قبل ہو جانا ایک درست عمل ہو گا۔‘‘

کرسٹیان ڈیُؤر کے مطابق اس مائیگریشن پیکج میں ملک بدری کے سخت تر ضوابط اور مہاجرین کے لیے مالی اور سماجی سہولیات میں واضح کمی جیسے عوامل کو ضرور شامل کیا جانا چاہیے۔ انہوں نے مزید کہا کہ اس بارے میں وفاقی جرمن وزیر محنت موجودہ قوانین میں ترمیم کی تجویز جلد ہی پیش کریں گے۔ ان کا مزید کہنا تھا، ''میں وفاقی صوبوں سے یہ توقع بھی کرتا ہوں کہ وہ بھی اپنا ہوم ورک کریں اور آئندہ سال کے آغاز تک تارکین وطن کے لیے ایک نئے ادائیگی کارڈ کا منصوبہ پیش کریں۔‘‘

اس سلسلے میں مذکورہ بالا اجلاس میں جرمنی کے ریاستی وزرائے اعلیٰ  اور وفاقی چانسلر اولاف شولس نے مہاجرین پر اٹھنے والے اخراجات میں مالی اعانت سے متعلق تارکین وطن کے بارے میں موجودہ نظام میں تبدیلی پر بھی اتفاق کیا تھا۔ اس کا مطلب یہ ہو گا کہ پناہ کے متلاشی افراد کے لیے فوائد کم ہو جائیں گے۔ وفاقی کابینہ میں ملک بدری کے سخت تر قوانین پر اتفاق رائے پہلے ہی ہو چکا ہے۔

وفاقی حکومت یہ بھی جانچنا چاہتی ہے کہ آیا جرمنی میں پناہ کے حصول کے لیے سرکاری طریقہ کار کی یورپ سے باہر کے کسی تیسرے ملک میں تکمیل بھی ممکن ہو سکتی ہے۔

ک م/ م م (ڈی پی اے)