مشرق وسطٰی کے ليے جرمن خارجہ پاليسی

جرمن وزارت خارجہ کے ترجمان آندرياس پيشکے نے عرب دنيا کے حوالے سے جرمن خارجہ پاليسی کے بارے ميں ڈوئچے ويلے کے تحريری سوالنامے کے جواب ميں لکھا ہے کہ جرمنی نے اس خطے ميں اپنی خارجہ پاليسی کی راہ تلاش کر لی ہے۔ اس ميں يہ بھی کہا گيا ہے کہ جرمنی نے شروع ہی سے عرب دنيا ميں جمہوری تبديليوں کی حمايت کی ہے۔ اُس نے ہميشہ ہی يہ بھی واضح کيا ہے کہ بڑی معاشرتی تبديليوں کے دوران بھی انسانی حقوق کا احترام کيا جانا چاہيے۔ نئی حکومتوں کو معاشرے کے تمام گروپوں اور مذہبی گروپوں کو بنيادی حقوق اور مواقع فراہم کرنا چاہئيں۔

تاہم عرب دنيا ميں آنے والی تبديليوں سے جرمن وزارت خارجہ کو يہ موقع بھی ملا کہ يہ تبديلياں واقع ہونے سے پہلے حالات کا ايک بار پھر تنقيدی جائزہ ليا جائے۔

جرمنی مصر اور تيونس کے سابق مطابق العنان حکمرانوں کے ساتھ سلامتی، پناہ گزينوں کے بارے ميں پاليسی اور تجارت و تعاون کے شعبوں ميں تعاون کر چکا ہے۔ جرمنی کی سوشل ڈيمو کريٹک پارٹی ايس پی ڈی سے قربت رکھنے والی فريڈرش ايبرٹ فاؤنڈيشن کے مشرق وسطٰی اور شمالی افريقہ کے امور کے ذمہ دار ہايو لانس نے کہا کہ جرمن حکومت پر يہ الزام نہيں لگايا جا سکتا کہ اُس نے ان دونوں ممالک کی سابقہ حکومتوں کو طاقتور بنايا يا ان کے قائم رہنے ميں مدد دی تھی۔ ليکن انہوں نے يہ تسليم کیا کہ ان ممالک کے عوام کے مسائل، انسانی حقوق اور کھلے سياسی نظام جيسے امور کو نظر انداز کيا گيا۔

جرمن پارليمنٹ کی خارجہ امور کی کميٹی کے چيئر مين روپريشت پولنس کا نقطہء نظر بھی يہی ہے۔ انہوں نے کہا کہ جرمن حکومت عرب ممالک سے اقتصادی تعاون اور بين الاقوامی دہشت گردی کے بارے ميں بات چيت کرتی، محفوظ سرحدوں کے اندر دو رياستی حل کی بنياد پر اسرائيل کی حمايت کرتی ہے اور وہ قانونی رياست اور انسانی حقوق کے ليے بھی آواز بلند کرتی ہے ليکن عملی طور پر انسانی حقوق کو نظر انداز ہی کر ديا جاتا ہے۔

شام کی صورتحال جرمنی سے بھی اقدامات کی تقاضہ کرتی ہے جہاں طاقت کا استعمال جاری ہے۔ فريڈرش ايبرٹ فاؤنڈيشن کے ہايو لانس نے کہا کہ چند ہفتے قبل قائم ہونے والے شامی اپوزيشن اتحاد کو مدد دينا عقلمندی کی بات ہو گی اور اسے اسلحہ دينے پر بھی غور کرنا ہو گا تاکہ شامی حکومت کے نسل کشی کے مترادف فوجی حملوں کو روکا جا سکے۔

جرمن حکومت نے اسرائيلی فلسطينی تنازعے ميں اقوام متحدہ ميں فلسطين کی غير رياستی رکنيت کی مخالفت نہيں کی کيونکہ فلسطينيوں نے اپنی قرارداد ميں 1967 کی سرحدوں کے اندر اسرائيل کو تسليم کيا ہے۔ اس طرح جرمنی نے دو رياستی حل کے حوالے سے اسرائيل کی جانب بھی ايک مضبوط پيغام بھيجا ہے۔

K.Knipp,sas/A. Noll,ij