مودی حکومت پر تنقید کرنے والے بھارتی صحافی پھر نشانے پر

انسانی حقوق کی بین الاقوامی تنظیم ایمنسٹی انٹرنیشنل اور امریکی اخبار دی واشنگٹن پوسٹ کی جانب سے شائع ہونے والی ایک مشترکہ تحقیقاتی رپورٹ میں انکشاف کیا گیا ہے کہ بھارت میں مودی حکومت نے پیگاسس اسپائی ویئر کے ذریعے ایک بار پھر ہائی پروفائل بھارتی صحافیوں کو نشانہ بنایا ہے۔

 اسرائیلی کمپنی این ایس او گروپ  کی جانب سے تیار کردہ پیگاسس سافٹ وئیرموبائل فون میں موجود میسجز، ای میلز اور تصاویر تک رسائی حاصل کرنے کے ساتھ ساتھ فون کالوں کو سننے اور لوکیشن ٹریک کرنے کی صلاحیت رکھنے اور یہاں تک کے موبائل فون کے مالک کی فلم بنانے کے لیے استعمال کیا جا سکتا ہے۔

ایمنسٹی انٹرنیشنل نے اسپائی ویئر کے وسیع پیمانے پر استعمال کو دستاویزی شکل دی ہے۔ یہ ٹیکنالوجی عام طور پر صرف حکومتوں یا سکیورٹی ایجنسیوں کو فروخت کی جاتی ہے۔ تاہم بھارت سمیت درجنوں دیگر ممالک میں اس ٹیکنالوجی کا استعمال صحافیوں اور انسانی حقوق کے لیے کام کرنے والے کارکنوں کے خلاف ہو رہا ہے۔

صحافیوں کے لیے خطرناک ماحول

ایمنسٹی انٹرنیشنل نے شائع کردہ حالیہ رپورٹ میں بتایا گیا ہے کہ بھارتی آن لائن نیوز آؤٹ لیٹ دی وائر سے منسلک صحافی سدھارتھ وردراجن اور دی آرگنائزڈ کرائم اینڈ کرپشن رپورٹنگ پراجیکٹ (او سی سی آر پی) کے آنند منگلے کے زیر استعمال آئی فونز کو اسپائی ویئر کے ذریعے نشانہ بنایا گیا تھا۔

 ایمنسٹی انٹرنیشنل کی سکیورٹی لیب کے سربراہ ڈونچا اوسیئربھائل نے کہا، ''بھارت میں صحافیوں کو محض اپنے کام کرنے کے لیے بڑھتی ہوئی غیر قانونی نگرانی کے خطرے کا سامنا ہے۔‘‘

انہوں نے مزید کہا کہ یہ ان صحافیوں کے لیے پہلے سے موجود  خطرناک ماحول کو مزید ہوا دیتا ہے جنہیں ''سخت قوانین کے تحت قید،  بدنامی کی مہم، ہراساں کیے جانے اور دھمکیوں‘‘ کا سامنا ہے۔ بھارت کی حکومت نے فوری طور پر اس الزام کا جواب نہیں دیا، جس میں کہا گیا تھا کہ اسپائی ویئر کے استعمال کا سب سے حالیہ تصدیق شدہ کیس رواں سال اکتوبر میں پیش آیا۔

 حکومت مخالفین نشانے پر

نئی دہلی پر سال 2021ء میں یہ الزام لگا تھا کہ وہ پیگاسس کے ذریعے صحافیوں، حزب اختلاف سے تعلق رکھنے والے سیاست دانوں اور انسانی حقوق کے لیے کام کرنے والے کارکنوں کی نگرانی میں مصروف ہے۔ لیک ہونے والی دستاویزات کے ساتھ یہ دکھایا گیا تھا کہ اسپائی ویئر کو 1,000 سے زائد بھارتی فون نمبروں کے خلاف استعمال کیا گیا تھا۔

 وزیر اعظم نریندر مودی کے اہم سیاسی حریف اور حزب اختلاف کی جماعت کانگریس کے رہنما راہول گاندھی بھی نشانہ بننے والوں میں شامل تھے۔ تاہم حکومت نے کسی بھی طرح کی ’غیر قانونی نگرانی‘ کرنے سے انکار کیا تھا لیکن مودی حکومت  ان الزامات کے خلاف  بھارتی سپریم کورٹ کی تحقیقات میں تعاون کرنے سے انکار کرتے ہوئے ان تحقیقات کے نتائج کو بھی عام نہیں کیا۔

بھارتی حکومت کی جاسوسی سرگرمیوں سے متعلق تازہ رپورٹ کے مطابق جن دوتنظیموں کو ہدف بنایا گیا، ان میں سے (او سی سی آر پی) نے اگست میں وزیر اعظم مودی کے انتہائی قریبی سمجھے جانے والے بھارتی کاروباری ٹائیکون گوتم اڈانی کے مالی معاملات کی تحقیقات شائع کی تھیں۔

اڈانی گروپ کو رواں سال کے شروع میں اس وقت 100 بلین ڈالر سے زائد کا مالی نقصان کا سامنا کرنا پڑا  تھا، جب امریکہ کی ایک شارٹ سیلر کمپنی 'ہینڈنبرگ ریسرچ‘ کی رپورٹ میں الزام عائد کیا گیا تھا کہ اڈانی گروپ کئی عشروں سے اسٹاک ہیرا پھیری اور اکاؤنٹ فراڈ میں ملوث ہیں۔ اڈانی گروپ  نے ان الزمات کو اپنے خلاف ایک ''منظم مہم‘‘ قرار دے کرمسترد کر دیا تھا۔

 آرگنائزڈ کرائم اینڈ کرپشن رپورٹنگ پراجیکٹ کے آنند منگلے نے اے ایف پی کو بتایا کہ ان کی جانب سے اڈانی گروپ کو ان کی مبینہ ہیرا پھیری سے متعلق سوالات بھجوانے کے صرف ''چند گھنٹوں کے اندر‘‘ ہی انہیں جاسوسی کا نشانہ بنایا گیا۔ انہوں نے مزید کہا کہ میں اس کے لیے اڈانی گروپ یا مودی حکومت کو مورد الزام نہیں ٹھہرا سکتا کیونکہ ہمارے پاس ابھی تک ثبوت نہیں ہیں۔‘‘ تاہم ان کا مزید کہنا تھا، ''لیکن ماضی کے واقعات ہمیں اس جانب سوچنے پر مجبور کر رہے ہیں۔‘‘

 سکڑتی ہوئی ا‌ٓزادی صحافت

دی وائر کے صحافی وردراجن نے واشنگٹن پوسٹ کو بتایا کہ انہیں نئی ​​دہلی میں ایک ممتاز نیوز پبلشر کی حراست کی مخالفت پرنشانہ بنایا گیا تھا۔ بھارت میں سماجی کارکنوں کا کہنا ہے کہ مودی حکومت کے دور میں دنیا کی سب سے بڑی جمہوریت کا دعویٰ کرنے والے ملک میں آزادی صحافت کو نقصان پہنچا ہے۔

صحافیوں کے تحفظ کی عالمی تنظیم رپورٹرز ودآؤٹ بارڈرز کے دنیا میں آزادی صحافت سے متعلق مرتب کردہ ورلڈ پریس فریڈم انڈیکس میں نریندر مودی کی طرف سے وزیر اعظم کا عہدہ سنھالنے کے بعد سے بھارت 180 ممالک  کی اس فہرست میں 161 نمبر پر آچکا ہے جبکہ مودی سے قبل بھارت اس فہرست میں 21ویں نمبر پر تھا۔

 حکومت پر تنقیدی رپورٹنگ کرنے والے صحافیوں کا الزام ہے کہ انہیں عدالتوں کی جانب سے بھی ہراساں کیا جاتا ہے اوران کے خلاف آن لائن بدسلوکی کی مسلسل مہم چلائی جاتی ہے۔

م ق⁄ ش ر( اے ایف پی)