نائجیریا میں مزید 91 افراد اغوا

خبر رساں ادارے اے پی نے منگل کے دن بتایا ہے کہ نائجیریا میں فعال اسلام پسند تنظیم بوکو حرام کے مشتبہ جنگجوؤں نے ویک اینڈ کے دوران مختلف دیہات میں پر تشدد کارروائیاں کرتے ہوئے جن افراد کو اغوا کیا ہے، ان میں تین تین برس کے چھوٹے بچے بھی شامل ہیں۔ اغوا کی یہ تازہ وارداتیں اُنہی شمالی علاقوں میں ہوئی ہیں، جہاں شدت پسندوں نے چودہ اپریل کو ایک اسکول کی تقریباﹰ دو سو طالبات اغوا کر لی تھیں۔ ان بچیوں کو بوکو حرام نے ابھی تک کسی نامعلوم جگہ پر یرغمال بنا رکھا ہے۔

امریکی خبر رساں ادارے ایسوسی ایٹڈ پریس نے عینی شاہدین کے حوالے سے بتایا ہے کہ بوکو حرام کے مشتبہ جنگجوؤں کی اس تازہ کارروائی میں ساٹھ خواتین اور اکتیس لڑکوں کو اغوا کیا گیا ہے۔ بتایا گیا ہے کہ اغوا کی جانے والی خواتین میں شادی شدہ عورتیں بھی شامل ہیں۔ مقامی حکام نے ان واقعات کی تصدیق کی ہے جبکہ فوج نے ایسی خبروں کو مسترد کر دیا ہے۔

فوج کے مطابق بورنو ریاست کے دارالحکومت میدوگوری سے 150 کلو میٹر دور واقع کومابزا نامی شہر سے موصول ہونے والی ایسی خبروں کی آزادنہ طور پر تصدیق کرنا ممکن نہیں ہے۔ تاہم میدوگوری کے ایک کمیونٹی رہنما اجی خلیل نے دعویٰ کیا ہے کہ جنگجوؤں نے ہفتے کے دن حملہ کرتے ہوئے نہ صرف لوگوں کو اغوا کیا بلکہ اس کارروائی میں چار افراد مارے بھی گئے۔ دوسری طرف ایک مقامی انٹیلی جنس اہلکار کا کہنا ہے کہ تیرہ تا پندرہ جون تین مختلف دیہات میں اغوا کی وارداتیں ہوئی ہیں تاہم یہ نہیں کہا جا سکتا کہ کتنے لوگ یرغمال بنائے گئے ہیں۔

نائجیریا کی متعدد نمایاں شخصیات نے اغوا کی ایسی تازہ کارروائیوں کی خبروں کی صداقت کو چیلنج کیا ہے۔ اس افریقی ملک کی خاتون اول پیشنز جوناتھن نے بھی دعویٰ کیا ہے کہ یہ جھوٹی خبریں اس لیے پھیلائی جا رہی ہیں تاکہ ان کے شوہر صدر گڈ لک جوناتھن کی انتظامیہ کو تنقید کا نشانہ بنایا جا سکے۔

دریں اثناء بوکو حرام پر لکھی جانے والی ایک کتاب کے مصنف جیکب زین نے کہا ہے کہ اغوا کی ان تازہ خبروں سے ظاہر ہوتا ہے کہ نائجیریا اور کیمرون کے سرحدی علاقوں پر سکیورٹی کو یقینی بنانے کے حوالے سے بین الاقوامی کوششیں بھی ناکام ہو گئی ہے۔ یہ امر اہم ہے کہ ابوجہ حکومت کے بقول اسے علم ہے کہ جنگجوؤں نے اسکول کی طالبات کو کہاں یرغمال بنا رکھا ہے تاہم وہ سکیورٹی خدشات کی وجہ سے انہیں بازیاب کرانے کے لیے کوئی عسکری ایکشن نہیں کر سکتے ہیں۔