نازی سوشلسٹ گروپ، پارلیمانی کمیٹی کی رپورٹ پر ڈی ڈبلیو کا تبصرہ

اس رپورٹ میں قتل کی ان وارداتوں کی تفتیش میں کوتاہی برتنے پر سلامتی کے ذمہ دار اداروں کوکڑی تنقید کا نشانہ بنایا گیا ہے۔ ڈوئچے ویلے کے تبصرہ نگار مارسیل فُرسٹیناؤ کے بقول پارلیمانی کمیٹی نے اس سلسلے میں بھرپور انداز میں اپنی ذمہ داریاں نبھائی ہیں۔

مارسیل فُرسٹیناؤ کے بقول اب سیاستدانوں اور معاشرے کی ذمہ داری ہے کہ وہ پارلیمانی کمیٹی کی رپورٹ میں پیش کردہ تجاویز پرعمل کریں۔ وہ مزید لکھتے ہیں کہ آئینی سلامتی کے ذمہ داروں کی جانب سے کڑی نگرانی کے باوجود 1990ء کی دہائی کے اواخر میں دائیں بازو کے انتہا پسند اچانک منظر عام سے غائب ہو گئے تھے۔ اس دوران نظروں سے اوجھل رہتے ہوتے انہوں نے قتل کی یہ وارداتیں کی تھیں۔ انہوں نے تارکین وطن کا پس منظر رکھنے والے نو افراد کو ایک ہی ہتھیار استعمال کرتے ہوئے ہدف بنا کر قتل کیا تھا۔ نومبر2011ء میں پولیس کو دائیں بازو کے اس گروپ کے دو مرد ارکان مردہ حالت میں ملے تھے۔ ان دونوں نے گرفتاری سے بچنے کے لیے خود کشی کر لی تھی۔ اس کے بعد ان کی تیسری ساتھی بیاٹے چَیپے کچھ عرصہ مفرور رہنے کے بعد پولیس کے سامنے پیش ہو گئی تھی۔

ابتدائی سالوں میں خیال کیا جاتا رہا کہ ترک پس منظر رکھنے والے نو اور ایک یونانی تارک وطن کے قتل میں ایک منظم جرائم پیشہ گروہ کا ہاتھ ہے۔ اس سلسلے میں مرنے والوں کے لواحقین پر بھی خصوصی طور پر شک کیا جاتا رہا۔ تفتیشی حکام نے مقتولین کا تعلق مافیا اور منشیات فروشوں سے جوڑا اور ان پر رقم کی غیر قانونی منتقلی تک کے الزامات عائد کیے۔

ڈی ڈبلیو کے تبصرہ نگار کہتے ہیں کہ اس دوران تفتیشی افسران کی توجہ اس جانب گئی ہی نہیں کہ ان وارداتوں کے پیچھے نسل پرستانہ محرکات بھی ہو سکتے ہیں۔ اس تناظر میں ایک دستاویز میں تحریر ہے کہ پولیس کا شک مختلف سمت میں ہونے کی وجہ سے دائیں بازو کے انتہا پسند گروپ کے لیے اپنی کارروائیاں جاری رکھنا اور بھی آسان ہو گیا تھا۔

ڈوئچے ویلے کے تبصرہ نگار کے بقول اس کے باوجود یہ لازمی اور ضروری ہے کہ جرمن پارلیمان کی تحقیقاتی کمیٹی کے سربراہ کو واضح انداز میں یہ کہنا چاہیے کہ غیر ملکیوں کے قتل کی یہ وارداتیں سرکاری اہلکاروں کی نا اہلی کا ایک تاریخی ثبوت ہیں۔ اس سے بھی زیادہ ضروری یہ ہے کہ یہ کمیٹی بتائے کہ نازی سوشلسٹ انڈر گراؤنڈ نامی گروہ کے ہاتھوں اس تباہی سے کیا سبق سیکھا گیا ہے۔ مارسیل فُرسٹیناؤ مزید کہتے ہیں کہ اس حوالے سے پہلا قدم اٹھا لیا گیا ہے اور وہ ہے ایک مرکزی ڈیٹا بینک کا قیام۔ اس میں دائیں بازو کی انتہاپسندانہ کارروائیوں اور نسل پرستانہ جرائم سے متعلق اعداد و شمار جمع کیے جائیں گے۔