نیو ٹاؤن اسکول شوٹنگ، ہلاک شدگان کی شناخت کردی گئی

کنیٹیکٹ کے طبی حکام نے بتایا ہے کہ شوٹنگ کے واقعے میں ہلاک ہونے والے تمام بچے فرسٹ گریڈ کے تھے اور ان کی عمریں چھ یا سات برس تھیں۔ ہلاک ہونے والے بچوں میں بارہ لڑکیاں جبکہ آٹھ لڑکے شامل ہیں۔ طبی حکام کے مطابق قریب تمام ہلاک شدگان ہی متعدد گولیاں لگنے سے ہلاک ہوئے، بعض بچوں کے جسم سے تین تا گیارہ گولیاں نکالی گئی ہیں۔

مزید تحقیقات کے بعد پولیس نے بتایا ہے کہ جمعہ کے دن بیس سالہ حملہ آور ایڈم لانزا نے فوجی رائفل سے بلا اشتعال فائرنگ کرتے ہوئے بیس بچوں اور اسکول میں کام کرنے والی چھ خواتین کو ہلاک کر دیا تھا، ان خواتین کی عمریں ستائیس اور چھپن برس کے درمیان بتائی گئی ہیں۔ اسکول میں فائرنگ کے واقعہ سے قبل اپنے گھر میں اپنی والدہ کو جان سے مارنے والے حملہ آور نے بعد ازاں خود کو بھی ہلاک کر لیا تھا۔

نئے انکشافات

ابتدائی تحقیقات کے دوران معلوم ہوا تھا کہ ایڈﺍ لانزا نے فائرنگ کی یہ واردات دو پستولوں سے سر انجام دی تھی، جو فوجی رائفل کے ساتھ ہی جائے وقوعہ سے برآمد ہوئی تھیں۔ تاہم ہلاک شدگان کے پوسٹ مارٹم کے بعد واضح ہوا کہ اسکول میں ہلاک ہونے والوں کو پستولوں سے نشانہ نہیں بنایا گیا تھا۔

حکام نے بتایا ہے کہ ایڈم لانزا اور اس کے گھر میں ہلاک ہونے والی نینیسی لانزا نامی اس کی والدہ کی ہلاکت کی وجوہات جاننے کے لیے ابھی طبی معائنہ جاری ہے۔ ایسی اطلاعات بھی غلط ثابت ہو گئی ہیں کہ ایڈم لانزا کی والدہ اسی اسکول میں ٹیچر تھیں، جہاں شوٹنگ کا واقعہ پیش آیا تھا۔

امریکی ریاست کنیٹیکٹ کی پولیس کے مطابق ابھی اس بارے میں تفتیشی عمل جاری ہے کہ ایڈم لانزا کی اس بہیمانہ کارروائی کی پیچھے کیا محرکات کار فرما تھے۔ حکام نے یہ تصدیق بھی کی ہے کہ حملہ آور کو روکنے کی کوشش کی گئی تھی لیکن وہ اسکول میں زبردستی گھس گیا تھا۔

امریکی صدر باراک اوباما کا دورہ

خبر رساں ادارے روئٹرز کے مطابق امریکی صدر باراک اوباما سینڈی ہُک ایلمینٹری اسکول کے متاثرین سے تعزیت کے لیے آج بروز اتوار نیو ٹاؤن کا دورہ کر رہے ہیں۔ اس دوران وہ ایک بین المذاہب تقریب میں بھی شرکت کریں گے۔ وائٹ ہاؤس کے ترجمان جے کارنی کے مطابق صدر اوباما عالمی وقت کے مطابق صبح بارہ بجے اسی تقریب میں خطاب بھی کریں گے۔

اگرچہ ماضی میں بھی امریکا میں ایسے متعدد پر تشدد واقعات رونما ہو چکے ہیں تاہم نیوٹاؤن کے پرائمری اسکول میں رونما ہونے والے واقعے سے قبل کبھی بھی بچے اس طرح فائرنگ میں ہلاک نہیں ہوئے تھے۔ ناقدین کا خیال ہے کہ جب امریکی صدر باراک اوباما متاثرین سے خطاب کریں گے تو ممکنہ طور پر ’معنی خیز عمل‘ کے بارے میں بھی بات کریں گے۔ شوٹنگ کے اس واقعہ کے بعد صدر اوباما نے کہا تھا کہ اب گن کنٹرول کے لیے ’معنی خیز عمل‘ کا وقت آگیا ہے تاہم انہوں نے گن کنٹرول پر سخت قوانین کے بارے میں کوئی تبصرہ نہیں کیا تھا۔

نیوٹاؤن کے اس المناک واقعے کے بعد کئی ڈیموکریٹ سیاستدانوں نے امریکا میں گن کنٹرول پر سخت قوانین متعارف کروانے کی ضرورت پر زور دیا ہے۔ تاہم یہ ایک ایسی تجویز ہے، جس پر ’پُرو۔گن لابی‘ کی طرف سے سخت مخالفت یقینی تصور کی جاتی ہے۔ یہ امر اہم ہے کہ یہ موضوع سیاسی حوالے سے بھی حساس تصور کیا جاتا ہے۔

(ab/ij (Reuters, AP,dpa