نیوزی لینڈ کے وزیراعظم نے ویٹرس سے معذرت کر لی

وزیراعظم کی ایک ترجمان نے بدھ کے روز کہا کہ اس سلسلے میں وزیراعظم کی نے اس ہوٹل ملازمہ سے باقاعدہ معذرت کی ہے۔

اس ویٹرس نے اپنا نام ظاہر کیے بغیر ایک ویب سائٹ ’ڈیلی بلاگ‘ میں ایک مراسلہ لکھا تھا، جس میں کہا گیا تھا، ’کی نے کسی اسکول کے میدان میں کھیلنے والے لڑکے کی طرح کے رویّے کا مظاہرہ کیا، جو چھوٹی بچیوں کی چٹّیا کھینچتے پھرتے ہیں، اور ان پر اپنے زیادہ طاقت ور ثابت کرنے کی کوشش کرتے ہیں ۔‘

وزیراعظم کی ترجمان کے مطابق یہ واقعات اسی کیفے میں پیش آئے، جس میں وزیراعظم اپنی اہلیہ کے ہمراہ متواتر جاتے ہیں۔

’’دونوں کے تعلقات اس کیفے میں کام کرنے والوں سے نہایت اچھے ہیں۔ ایسا کوئی فعل مذاقاﹰ ہو سکتا ہے اور وزیراعظم کا مقصد کبھی اس لڑکی کو برا محسوس کرانا ہر گز نہیں تھا اور انہوں نے اس لڑکی سے معذرت کی ہے۔‘

اس ویٹرس کا کہنا تھا کہ یہ واقعات اس وقت پیش آئے، جب سن 2014ء میں کی نے عام انتخابات کے لیے اپنی مہم کے دوران اس کیفے میں زیادہ آناجانا شروع کیا۔ ’اس دوران انہوں نے کئی بار میری چٹّیا کھینچی، جس سے مجھے محسوس ہوا، جیسے میں کم طاقت ور ہوں۔‘

اس ویٹرس کے مطابق، ’ایک مرتبہ کی نے کہا کہ یہ ترسانے والی چٹّیا ہے۔‘

اس ویٹرس نے مزید کہا، ’آخری بار یہ واقعہ 26 مارچ کو رونما ہوا، تو میں نے کی سے کہا کہ اب ایسا مت کیجیے گا ورنہ میں تمہیں ماروں گی۔‘

اس ویٹرس کے مطابق، ’کی اسی روز دوبارہ کیفے میں آئے اور ان کے ہمراہ وائن کی دو بوتلیں بھی تھیں اور انہوں نے کہا یہ تمہارے لیے ہیں۔ میں معذرت چاہتا ہوں، مجھے احساس نہیں تھا۔‘