نیوٹاؤن اسکول حملہ، دو بچوں کی آخری رسومات ادا کر دی گئیں

نیوٹاؤن کے سینڈی ہُک ایلیمنٹری اسکول میں جمعے کے روز ایک 20 سالہ حملہ آور نے خودکار رائفل اور ہینڈگنز کا استعمال کرتے ہوئے 20 بچوں سمیت 26 افراد کو موت کے گھاٹ اتار نے کے بعد مبینہ طور پر خودکشی کر لی تھی۔ اس واقعے کے بعد امریکا بھر میں ایک مرتبہ پھر خودکار ہتھیاروں کی ملکیت کے حوالے سے ایک بحث چھڑ گئی ہے۔

اس واقعے میں ہلاک ہونے والے لڑکیوں میں سے ایک لڑکی کی آخری رسومات آج منگل کے روز ادا کی جا رہی ہیں۔ ہلاک ہونے والے ان بچوں کی عمریں چھ سے سات برس کے درمیان تھیں جبکہ اس واقعے میں اسکول میں کام کرنے والے چھ بالغ افراد بھی شامل تھے۔ اس سے قبل حملہ آور نے اپنی والدہ کو بھی موت کے گھاٹ اتار دیا تھا۔ چھ سالہ جیک پِنٹو کی آخری رسومات کے موقع پر 20 بچے اسے آخری سلام پیش کرنے اس تقریب میں موجود تھے۔

اس موقع پر ریاست کے گورنر ڈینیل میلوئی نے کہا، ’جب آپ ان چھوٹے چھوٹے تابوتوں کو دیکھتے ہیں، تو آپ کا دل پھٹنے لگتا ہے۔‘ خبر رساں ادارے روئٹرز کے مطابق اس واقعے کے بعد نیوٹاؤن کے تمام اسکول ابھی تک بند ہیں تاہم وہ جلد ہی دوبارہ کھل جائیں گے۔

ادھر اتوار کے روز نیوٹاؤن میں اس واقعے کے تناظر میں منعقدہ کی جانے والی خصوصی تقریب میں شرکت کے بعد واشنگٹن واپس پہنچنے والے امریکی صدر باراک اوباما نے ملک میں ایسے واقعات کی روک تھام کے سلسلے میں نائب صدر جوبائیڈن اور اپنی کابینہ کے متعدد ارکان سے ملاقاتیں کیں۔

اتوار کے روز تقریب میں خطاب کے دوران اوباما کا کہنا تھا کہ نیوٹاؤن جیسے واقعات کو کسی صورت قبول نہیں کیا جا سکتا اور ان کے تدارک کے لیے کوششیں کرنا ہوں گی۔ اس موقع پر ان کا کہنا تھا کہ وہ ایسے واقعات کی روک تھام کے لیے بطور صدر تمام ممکنہ کوششیں کریں گے۔ تاہم انہوں نے یہ بھی کہا کہ خودکار ہتھیاروں سے جڑے پرتشدد واقعات کی روک تھام کے لیے اب تک کئے جانے والے اقدامات ناکافی ہیں۔

at/ab (Reuters)