نیویارک کی عمارت میں آتشزدگی، 19 افراد ہلاک

نیویارک شہر کے میئر ایرک ایڈمس نے بتایا کہ آتشزدگی کا یہ واقعہ شہر کے برونکس علاقے میں واقع ٹوئن پارک اپارٹمنٹ میں اتوار کو صبح تقریباً گیارہ بجے پیش آیا۔ اس سانحے میں 19افراد ہلاک ہوچکے ہیں۔ انہوں نے بتایا کہ جس 19منزلہ عمارت میں آگ لگی اس میں گیمبیا نژاد افراد بڑی تعداد میں رہتے ہیں۔

محکمہ فائربریگیڈ کے حکام کے مطابق آگ ایک الیکٹرک ہیٹر سے شروع ہوئی اور حالیہ تاریخ میں یہ اپنی نوعیت کا آتشزنی کا بدترین واقعہ ہے۔

اب تک کیا معلوم ہوسکا ہے

نیویارک کے میئر ایرک ایڈمس نے کم از کم 19افراد کی ہلاکت کی تصدیق کردی ہے۔

حکا م کے مطابق آگ ایک اپارٹمنٹ میں الیکٹرک ہیٹر سے شروع ہوئی اور جلد ہی عمارت کی دوسری اور تیسری منزل تک پھیل گئی۔ محکمہ فائر  کے کمشنر ڈینیئل نیگرو نے ایک پریس کانفرنس سے خطاب کرتے ہوئے بتایا کہ حالانکہ آگ بڑی حد تک صرف راہداری تک محدود تھی تاہم اس کا دھواں عمارت کی تمام منزلوں تک پھیل گیا کیونکہ بیشتر کمروں کے دروازے کھلے ہوئے تھے۔

ایرک ایڈمس نے نیوز چینل سی این این سے بات کرتے ہوئے کہا،" یہ ہماری تاریخ میں آتشزدگی کے بدترین واقعات میں سے ایک ہے۔ یہ نیویارک شہر کے لیے انتہائی بھیانک اور انتہائی تکلیف دہ وقت ہے۔ ہلاکتوں کی تعداد انتہائی بھیانک ہے۔"

ایک دیگر سرکاری عہدیدار نے خبر رساں ایجنسی ایسوسی ایٹیڈ پریس (اے پی) کو بتایا کہ ہلاک ہونے والوں میں نو بچے شامل ہیں۔

ایڈمس کے سینیئر ایڈوائزر اسٹیفن رنگیل نے نو بچوں کی موت کی تصدیق کرتے ہوئے کہا کہ ان کی عمر 16برس یا اس سے کم تھی۔

حکام نے بتایا کہ آتشزدگی کے اس واقعے میں تقریباً 60 افراد زخمی ہوئے ہیں۔ ان میں 32 کی حالت تشویش ناک ہے۔

عمارت کی ہر منزل پر متاثرین پڑے تھے

محکمہ فائر کے کمشنر نیگرونے بتایا کہ آگ پر قابو پانے کے لیے تقریباً 200 فائر ٹینڈر لگائے گئے۔ انہوں نے بتایا کہ عمارت کی ہر منزل پر متاثرین پڑے ہوئے پائے گئے۔

نیگرو نے بتایا،" متاثرین ہر منزل کی سیڑھیوں پر پائے گئے، انہیں دل کا دورہ پڑا تھا یا پھر دم گھٹ گیا تھا۔ "  انہو ں نے مزید بتایا کہ بیشتر افراد دھوئیں کی وجہ سے متاثر ہوئے ہیں، کیونکہ ہر طرف دھواں ہی دھواں پھیلا ہوا تھا۔

جس عمارت میں آتش زدگی کا واقعہ پیش آیا اس میں نسبتاً سستے قیمت پر مکانات دستیاب ہیں۔

ج ا/ص ز (اے پی، روئٹرز، اے ایف پی، ڈی پی اے)