وانواتو، خود کو معاف کرنے والے ممبران پارلیمان گرفتار

خبر رساں ادارے اے ایف پی نے وانواتو کی پارلیمنٹ کے اسپیکر مارسیلنیو پیپٹے کے حوالے سے بتایا ہے کہ ارکانِ پارلیمان کی معافی کا اعلان ملکی مفاد میں کیا گیا تھا۔

ملکی میڈیا کے مطابق ان تمام افراد پر بدعنوانی کے ایک اسکینڈل میں ملوث ہونے کا الزام عائد کیا جاتا ہے۔ تاہم مارسیلنیو اور دیگر سیاستدان ان الزامات کو مسترد کرتے ہیں۔

مارسیلنیو نے اتوار کے دن صدر بالڈوِن لونسڈالے کے ایک غیر ملکی دورے کے دوران بطور قائم مقام صدر اپنے لیے اور ان ممبران پارلیمان کی معافی کا فیصلہ کیا تھا۔

مارسیلنیو کے مطابق انہوں نے آئینی حدود میں رہتے ہوئے یہ فیصلہ کیا تھا اور انہیں اس پر کوئی شرمندگی نہیں ہے۔

تاہم ملکی صدر بالڈوِن جب غیر ملکی دورہ مکمل کر لے واپس وطن پہنچنے تو انہوں نے اسپیکر کے اس فیصلے کو واپس لے لیا۔

انہوں نے اپنے ایک نشریاتی خطاب میں کہا کہ ان کی حکومت جلد ہی اس معاملے کو حل کر لے گی۔ یہ امر اہم ہے کہ وانواتو سیاسی عدم استحکام کی وجہ سے مشہور ہے۔

اے ایف پی نے ایک مقامی نیوز ایجنسی کے حوالے سے جمعے کے دن تصدیق کی ہے کہ اسپیکر مارسیلنیو اور بدعنوانی کے ایک اسکینڈؒل میں ملوث دیگر گیارہ قانون سازوں کو گرفتار کر کے دارالحکومت پورٹ ولا کی ایک جیل میں منتقل کر دیا گیا ہے۔

حکام نے بتایا ہے کہ ان افراد پر الزام عائد کیا گیا ہے کہ انہوں نے انصاف کے نظام میں خلل ڈالنے کی سازش کی ہے۔

مقامی میڈیا کے مطابق یہ تمام سیاستدان بدعنوانی کے ایک اسکینڈل میں ملوث ہیں۔ ملکی وزیر اعظم ساٹو کلمان نے ابھی تک اس تازہ پیش رفت پر کوئی تبصرہ نہیں کیا ہے۔ انہیں جون میں وزارت عظمیٰ کے منصب پر فائز کیا گیا تھا۔