يونان مہاجرين کے ليے دروازے کھول دے، ترک صدر

ترکی کے صدر رجب طيب ایردوآن نے يونان پر زور ديا ہے کہ وہ مہاجرين کے ليے اپنے دروازے کھول دے۔ استنبول ميں اتوار آٹھ مارچ کو تقرير کرتے ہوئے انہوں نے کہا، ''ميں يونان سے اپيل کرتا ہوں کہ وہ بھی مہاجرين کے ليے اپنے دروازے کھول دے اور اس بوجھ سے آزاد ہو جائے۔‘‘ ترک صدر کی يہ تقرير ٹيلی وژن پر نشر کی گئی، جس ميں انہوں نے مزيد بتايا کہ مہاجرين کے بحران کی تازہ صورتحال کا حل تلاش کرنے کے ليے وہ پير نو مارچ کو بیلجيم کے دارالحکومت برسلز جائيں گے۔ ایردوآن نے اميد ظاہر کی کہ برسلز سے واپسی پر ان کے پاس موجودہ بحران کا کوئی حل ہو۔

ترک صدر نے فروری کے اواخر ميں اعلان کيا تھا کہ ان کے ملک ميں موجود تارکين وطن کو يورپ کی طرف بڑھنے سے نہيں روکا جائے گا۔ ان کے اس بيان نے ترک يونان سرحد پر ايک نيا بحران کھڑا کر ديا ہے۔ اس وقت تقريباً پينتيس ہزار تارکين وطن زمينی راستے سے يونان ميں داخل ہونے کی غرض سے سرحد پر جمع ہيں۔ ترک حکام کا الزام ہے کہ يونانی سرحدی گارڈز زمينی و سمندری راستوں سے مہاجرين کا داخلہ روکنے کے ليے طاقت کا استعمال جاری رکھے ہوئے ہيں۔ دوسری جانب ايتھنز حکومت کا موقف ہے کہ ایردوآن خود اس بحران کے ذمہ دار ہيں اور انہوں نے يورپی يونين پر دباؤ ڈالنے کے ليے يہ صورت حال پيدا کی۔

اس سلسلے ميں صدر ايردوآن نے ترک کوسٹ گارڈز کو احکامات جاری کيے تھے کہ مہاجرين و پناہ گزينوں کو بحيرہ ايجيئن پار کرنے کی کوششوں سے روکیں۔ اس صدارتی حکم کی وجہ مہاجرين کو سمندری سفر پر لاحق خطرات ہو سکتے ہیں۔ انقرہ حکومت نے وضاحت ديتے ہوئے مطلع کيا ہے کہ زمينی راستے سے مہاجرين کو آگے بڑھنے سے نہ روکنے کی پاليسی پر اب بھی عمل  جاری ہے اور تازہ احکامات سمندری راستے سے جانے والے تارکين وطن کے حوالے سے ہيں۔

يہ امر اہم ہے کہ ترکی ميں تقريباً چار ملين مہاجرين اور پناہ گزين پناہ ليے ہوئے ہيں۔ يورپی يونين اور انقرہ حکومت کے مابين ايک معاہدے کے تحت انقرہ حکومت ان پناہ گزينوں کو يونان کی طرف بڑھنے سے روکنے کی ذمہ دار ہے۔ ترکی کا دعوی ہے کہ يورپی يونين نے معاہدے کی شرائط پوری نہيں کيں ہیں۔ جب کہ سياسی مبصرين کی رائے ہے کہ ایردوآن يورپی يونين سے شمال مغربی شام ميں اپنی جنگی سرگرميوں کی حمايت کے طلب گار ہيں۔

ع س / ع ح، نيوز ايجنسياں