پاؤں کی بو ملیریا کےخلاف ہتھیار!

لیبارٹریز میں کی گئی مختلف سائنسی تحقیقات کے دوران یہ بات سامنے آئی ہےکہ گرم ملکوں میں پائی جانی والی ملیریا کی بیماری کا باعث بننے والے مچھر انسانی جسم کی بو کی جانب راغب ہوتے ہیں۔ اس تحقیق میں یہ بات بھی ثابت ہوئی کہ عام مچھروں کی نسبت ملیریا کا باعث بننے والے مچھر انسانی جرابوں کی بو کی جانب راغب ہوتے ہیں۔

اعداد و شمار یہ ظاہر کرتے ہیں کہ عام مچھروں کی نسبت ملیریا کے پیراسائٹس والے مچھر انسانی جرابوں کی بو کی طرف زیادہ راغب ہوتے ہیں۔ ماہرین کی جانب سے جاری کیے گئے اعداد و شمار کے مطابق جرابوں کی بو پر متوجہ ہونے والے مچھروں میں ملیریل پیراسائٹس کو انسانی جسم میں منتقل کرنے کا باعث بننے والے مچھر عام مچھروں کی نسبت تین گنا زیادہ ہیں۔

اس ریسرچ کے یہ نتائج مچھروں کے خلاف زیادہ مؤثر پھندے تیار کرنے میں معاون ثابت ہوں گے۔ اب ایسے پھندے تیار کرنے میں آسانی ہوگی جن کا نشانہ صرف ملیریا کی بیماری کے طفیلی جراثیم کو لے جانے والے مچھر ہوں گے۔

حفظان صحت اور گرم مرطوب خطوں میں پائی جانے والی بیماریوں پر تحقیق کرنے والے لندن میں قائم ادارے کے ایک ماہر ڈاکٹر جیمز لوگن کا اس حوالے سے کہنا ہے، ’’بو والے پیروں کا آخر کار فائدہ ہو ہی گیا۔‘‘ ملیریا کے پھیلاؤ کو روکنے کے حوالے سے اپنے ادارے کی کوششوں کا ذکر کرتے ہوئے ان کا کہنا تھا، ’’ہر بار جب ہم نے یہ جاننے کی کوشش کی کہ ملیریا کا مچھر انسانوں پر کس طرح حملہ آور ہوتا ہے، ہمیں پہلے سے بڑھ کر کامیابی ملی۔‘‘ یہ تازہ تحقیق ابھی حال ہی میں ایک سائنسی جریدے میں شائع ہوئی ہے۔

ملیریا ایک ایسی بیماری ہے جس کی وجہ سے ہر سال افریقہ میں چھ لاکھ افراد ہلاک ہوجاتے ہیں۔ ان میں اکثریت بچوں کی ہوتی ہے۔

ماہرین صحت طویل عرصے سے یہ جانتے ہیں کہ مچھر انسانی جسم کی بو کی جانب راغب ہوتے ہیں لیکن اس نئی تحقیق کی روشنی میں یہ بات سامنے آئی ہے کہ ملیریا کا باعث بننے والے مچھر عام مچھروں کی نسبت انسانی جسم کی بو کی جانب زیادہ راغب ہوتے ہیں۔ ایسے مچھر جو اپنے اندر ملیریا کی بیماری کا جراثیم لیے ہوتے ہیں، مچھروں کی کل آبادی کا صرف ایک فیصد ہوتے ہیں۔

لندن کے امپیریئل کالج آف میڈیکل سائنسز سے تعلق رکھنے والے جارج کرسٹوفیدیس کا کہنا ہے، ’’ہمارے سامنے یہ معلومات آئی ہیں کہ کس طرح ملیریا کا طفیلیہ مچھر پر قابو پا لیتا ہے۔ انہیں معلومات کو استعمال کرتے ہوئے ہم ملیریا کا باعث بننے والے مچھر پر قابو پائیں گے۔‘‘

zb/mm(AP)