پاکستان سے نیٹو ٹرک افغانستان پہنچنا شروع ہو گئے

گزشت برس نومبر میں قبائلی علاقے سلالہ میں فوجی چوکیوں پر امریکی ہیلی کاپٹروں کے حملے میں 24 پاکستانی فوجیوں کی ہلاکت کے بعد پاکستان نے افغانستان کے لیے نیٹو سپلائی روٹ کی بندش کے اعلان کے ساتھ ساتھ امریکا سے شمسی ائیر بیس خالی کرا لیا تھا۔ اس واقعے کے بعد دونوں ممالک کے درمیان پہلے سے کشیدہ تعلقات میں مزید تناؤ پیدا ہو گیا تھا۔

کراچی کی بندرگاہ سے بلوچستان اور خیبرپختونخواہ کے راستے افغانستان کے لیے رسد کی سپلائی کی بندش کے بعد ہزاروں ٹرک حکومتی اجازت کے منتظر پاکستان کے مختلف علاقوں میں کھڑے تھے۔ سپلائی روٹ کی بندش کے اعلان کے بعد رسد کی فراہمی سے منسلک ہزاروں افراد کو سخت معاشی مسائل کا سامنا تھا۔ نیٹو سپلائی ٹرکوں پر طالبان عسکریت پسندوں کے مسلسل حملوں کے باوجود یہ ڈرائیور اور دیگر افراد معاشی مجبوریوں کی وجہ سے ان ٹرکوں کے ذریعے افغانستان تک رسد کی فراہمی کا کام سرانجام دیتے ہیں۔

تاہم حکومتی فیصلے پر پاکستان کے متعدد حلقوں میں سخت احتجاج بھی کیا جا رہا ہے۔ ناقدین کا کہنا ہے کہ سپلائی لائن کھولنے کے لیے پارلیمان کی تجاویز میں واضح طور پر مطالبہ کیا گیا تھا کہ پاکستان کے قبائلی علاقوں میں امریکی ڈرون حملے بند ہونا چاہیں اور اس رسد کی فراہمی کے لیے راہداری فیس بڑھائی جانی چاہیے۔ پاکستان کی جانب سے مطالبہ کیا جا رہا تھا کہ امریکا فی ٹرک پانچ ہزار ڈالر ادا کرے جب کہ اس وقت پاکستان کو ڈھائی سو ڈالر فی ٹرک معاوضہ ادا کیا جاتا ہے۔

نیٹو سپلائی روٹ کی بندش کی وجہ سے پاکستان کو شدید بین الاقوامی دباؤ کا سامنا تھا جبکہ پاکستان کی اپوزیشن جماعتیں اس سپلائی روٹ کی بندش کے لیے پارلیمانی سفارشات پر عمل درآمد کے مطالبات کر رہی ہیں۔

ادھر امریکا میں صدر باراک اوباما کو انتخابی مہم کے دوران ریپبلکن جماعت کی جانب سے تنقید کا نشانہ بنایا جا رہا ہے کہ واشنگٹن انتظامیہ نے سلالہ حملے پر پاکستان سے معذرت کیوں کی۔

واضح رہے کہ پاکستان کی جانب سے نیٹو سپلائی روٹ کی بندش کی وجہ سے امریکا کو متبادل سپلائی روٹ کے لیے وسطی ایشیا کا ایک طویل اور مہنگا راستہ استعمال کرنا پڑ رہا تھا۔

at / sks (Reuters, AP)