پیئرسنگ کے عالمی چیمپئن کو دبئی میں داخل نہیں ہونے دیا گیا

رولف بُوخ ہولز اپنے جسم کو چھدوانے کے حوالے سے دنیا بھر میں جانے جاتے ہیں۔ ان کے جسم کے تمام حصوں پر چھلّے یا کیلیں دکھائی دیتی ہیں۔ ایک تازہ اخباری رپورٹ کے مطابق رولف بُوخ ہولز کو دبئی کے ایک ہوٹل میں منقعد کیے جانے والے ایک شو میں شرکت کرنا تھی تاہم ہوائی اڈے کی انتظامیہ نے انہیں شہر میں داخل ہی نہیں ہونے دیا۔ دبئی ایئر پورٹ کی انتظامیہ نے اس حوالے سے کچھ نہیں بتایا کہ انہوں نے53 سالہ جرمن شہری کو دبئی میں داخلے کی اجازت کیوں نہیں دی۔

اخبار نے مزید لکھا ہے کہ رولف بُوخ ہولز کو ہوائی اڈے سے ایک دوسری پرواز کے ذریعے استنبول روانہ کر دیا گیا۔ دبئی کے جس ہوٹل میں رولف کو شو میں شرکت کرنا تھی، اُس کے ایک ترجمان کے بقول ہوٹل انتظامیہ نے بہت کوشش کی کہ اُن کے مہمان کو متحدہ عرب امارات میں داخل ہونے دیا جائے لیکن وہ دبئی کے امیگریشن حکام کو قائل کرنے میں کامیاب نہ ہو سکے۔

قدامت پسند خلیجی ریاستوں میں دبئی سب سے زیادہ اعتدال پسند ریاست تصور کی جاتی ہے۔ یہاں آئے دن بالی وڈ اور دیگر ممالک کے فلمی ستارے مختلف تقریبات میں شرکت کرتے رہتے ہیں۔

اس سلوک پر بُوخ ہولز نے اپنے ایک ٹویٹر پیغام میں لکھا:’’میں اب کبھی دوبارہ دبئی نہیں جاؤں گا۔ مجھے آخر میں جواب مل گیا کہ انہوں نے مجھے کیوں داخل نہیں ہونے دیا۔ امیگریشن حکام سمجھے کہ میں کالا جادو کرنے والا کوئی جادوگر ہوں۔‘‘ رولف بُوخ ہولز پیشے کے اعتبار سے کمپیوٹر ٹیکنالوجی کے ماہر ہیں۔ پیئرسنگ کی وجہ سے 2012ء میں انہیں گنیز بک آف ورلڈ ریکارڈز میں شامل کیا گیا۔

انہوں نے اپنےجسم کو 453 مقامات سے چھدوایا ہوا ہے اور انہوں نے اپنے ماتھے پر دو سینگین بھی بنوا رکھی ہیں۔ اُنہوں نے اپنے چہرے کو تقریباً 170مقامات سے چھدوایا ہوا ہے اور صرف ہونٹوں پر ہی 94 پیئرسنگز ہیں۔ اس کے علاوہ اُن کا سینہ اور ناف بھی چھلّوں سے اٹے ہوئے ہیں۔ ساتھ ہی انہوں نے جسم کے نازک حصوں پر بھی 270 مرتبہ پیئرسنگ کروا رکھی ہے۔

رولف کے بقول انہوں نے جسم چھدوانے کی ابتدا 1999ء میں کی تھی اور پھر یہ سلسلہ شوق میں تبدیل ہوتا چلا گیا۔ اس کے بعد وہ ڈروٹمنڈ شہر کے ایک پیئرسنگ اسٹوڈیو کے مستقل گاہک بن گئے۔ وہ اپنے اس منفرد شوق کی وجہ سے پوری دنیا کا سفر کر چکے ہیں۔ وہ کہتے ہیں کہ فی الحال مزید پیئرسنگ کا اُن کا کوئی ارادہ نہیں۔