پیرس حملے کے بعد شارلی ایبدو کا پہلا شمارہ

بدھ کے روز اس ہفت روزہ جریدے کی تین ملین کاپیاں شائع کی گئی ہیں، جس کے صفحہ اول پر پیغمبر اسلام کی آنکھ سے ٹپکتا ہوا ایک آنسو دکھایا گیا ہے، ساتھ ہی درج ہے، ’سب کچھ معاف کیا گیا۔ میں شارلی ہوں۔‘

اس میگزین کی اشاعت کے ساتھ ہی پیرس کے مختلف علاقوں میں چند ہی ثانیوں میں اس اخبار کی تمام کاپیاں فروخت ہو گئیں۔

خیال رہے کہ پیرس حملے کے بعد دنیا بھر میں شارلی ایبدو اور اس کے صحافیوں کے ساتھ یکجہتی کے لیے آن لائن اور آف لائن مہم جاری ہے، جس کا نعرہ ہے، ژے سوئی شارلی یا میں شارلی ہوں۔‘ اس مہم میں فرانس اور دنیا بھر سے کئی ملین افراد شریک ہیں۔

اس اخبار پر حملہ آور ہونے والے مسلح افراد کے بارے میں کہا جا رہا ہے کہ انہوں نے ماضی میں اس اخبار میں پیغمبر اسلام کے خاکوں کی اشاعت کا بدلہ لیا۔ اس حملے کی ویڈیو فوٹیجز میں بھی حملہ آوروں کو ’اللہ اکبر‘ اور ’ہم نے پیغمبر کا بدلہ لے لیا‘ جیسے نعرے لگاتے سنا جا سکتا تھا۔

یہ بات اہم ہے کہ اس سے قبل شارلی ایبدو کی ساٹھ ہزار کاپیاں شائع ہوتی تھیں، جن میں سے کوئی تیس ہزار بکتی تھیں تاہم یہ نیا جریدہ تین ملین کی تعداد میں فرانسیسی زبان کے علاوہ انگریزی، ہسپانوی، اطالوی، عربی اور ترکی زبانوں میں شائع کیا گیا ہے۔

اخبار فروخت کرنے والوں کے مطابق اس اشاعت کی مانگ بہت زیادہ ہے۔ پیرس میں اخبارات فروخت کرنے والی ایک خاتون نے خبر رساں ادارے اے ایف پی کو بتایا، ’یہ غیر معمولی بات ہے کہ میں نے صبح پونے چھ بجے جب دکان کھولی تو ساٹھ تا ستّر افراد پہلے ہی سے قطار بنائے کھڑے تھے۔ میں نے اس سے قبل ایسا کبھی نہیں دیکھا۔ پندرہ ہی منٹ میں میری دکان پر دستیاب اس اخبار کی تمام 450 کاپیاں فروخت ہو گئیں۔‘

اس میگزین کا بچ جانے والا عملہ پیرس میں لبریشن اخبار کے دفتر میں منتقل ہو چکا ہے۔ اس اخبار سے وابستہ افراد نے دفتر کی منتقلی کو ایک انتہائی جذباتی تجربہ قرار دیا۔