ڈی ڈے، کب کیا ہوا؟
4 جون 2024
نصف شب کے فوری بعد اتحادی ممالک کے بائیس سو لڑاکا طیاروں نے نارمنڈی میں جرمن دفاعی پوزیشنوں کو نشانہ بنانا شروع کیا، جب کہ اس کے فوری بعد بارہ سو ہوائی جہازوں کے ذریعے تیئیس ہزار امریکی، برطانوی اور کینیڈین چھاتا بردار فوجی نارمنڈی اتر گئے۔
ڈی ڈے: کیا مشترکہ یادگاری تقریبات ممکن ہیں؟
برطانوی فورسز نے فرانسیسی شہر کَیں (Caen) میں دو پلوں پر قبضہ کر لیا۔ فورسز کمانڈر نے آپریشن کی کامیابی کی اطلاع دینے کے لیے مختص کوڈ ورڈ 'ہیم اینڈ جیم‘ کا استعمال کیا۔
رات ایک بج کر تیس منٹ پر امریکی فوج کی ایک سو ایک ویں چھاتا بردار ڈویژن نے اس کے پیچھے ساحل پر اترنا شروع کر دیا۔ اس عمل کا کوڈ نام 'یُوٹا‘ تھا۔
رات ڈھائی بجے امریکی فوج کی بیاسیویں چھاتا بردار ڈویژن کے یونٹوں نے مختلف مقامات پر اترنا شروع کیا۔
صبح پانچ بجے اتحادی بحری فورسز نے جرمن ساحلی دفاعی پوزیشنوں پر بمباری شروع کر دی جب کہ ساڑھے چھ بجے ساحلوں پر چھاتا بردار فوجیوں کے اترنے کا سلسلہ شروع ہو گیا۔
یُوٹا آپریشن میں تیئیس ہزار فوجیوں میں سےاتحادی افواج کے ایک سو ستانوے فوجی ہلاک یا زخمی ہوئے۔ جب کہ اوماہا بیچ لینڈنگ میں چونتیس ہزار فوجی اتارے گئے اور ہہاں چوبیس سو ہلاکتیں ہوئیں۔
دوسری جانب گولڈ نامی آپریشن جہاں پچیس ہزار برطانوی فوجی اتارے گئے، وہاں جرمن فوج کو پسپا کر دیا گیا اور اس جگہ چار سو برطانوی فوجی مارے گئے۔
ڈی ڈے ہی کے دوران جُونو نامی آپریشن میں برطانوی اور کینیڈین فوجی اکیس ہزار کی تعداد میں اتارے گئے، جن میں سے ساڑھے گیارہ سو ہلاک ہوئے۔
سورڈ یا تلوار نامی آپریشن میں برطانوی کمانڈوز کو فرانسیسی فوجی مدد حاصل تھی۔ اس دوران مشرقی ساحلی پٹی پر قبضہ کیا گیا۔ اس مقام پر انتیس ہزار فوجی اتارے گئے اور ان میں سے چھ سو تیس ہلاک ہوئے۔
ڈی ڈے کے دوران مقبوضہ فرانس میں نازی فوج کے خلاف اتحادی ممالک کے دستوں نے یہ لینڈنگ اور پھر وہاں عسکری کارروائیاں نارمنڈی کے مجموعی طور پر پانچ ساحلی علاقوں میں کیں۔
ع ت / م م (اے پی)