کابل ڈرون حملے کے لیے امریکی فوجیوں کو کوئی سزا نہیں

امریکی محکمہ دفاع پینٹاگون نے 13 دسمبر پیر کے روز کہا کہ افغانستان کے دارالحکومت کابل میں گزشتہ اگست کے اواخر میں کیے جانے والے ڈرون حملے کے لیے کسی بھی فوجی یا دیگر اہلکار کے خلاف کوئی تادیبی کارروائی نہیں کی جائے گی۔ اس امریکی حملے میں سات افغان بچوں سمیت دس عام شہری ہلاک ہو گئے تھے۔

گزشتہ ماہ امریکی محکمہ دفاع پینٹاگون کے ایک اندرونی جائزے میں یہ نتیجہ اخذ کیا گیا تھا کہ 29 اگست کو افغان دارالحکومت میں ہونے والے اس حملے میں کسی جنگی قوانین کی خلاف ورزی نہیں ہوئی اور نہ ہی یہ حملہ کسی مجرمانہ غفلت کی وجہ سے ہوا تھا۔

پینٹاگون کے ترجمان جان کربی نے کہا کہ وزیر دفاع لائیڈ آسٹن کو اس حملے سے متعلق جو اعلیٰ سطحی جائزے کی رپورٹ حاصل ہوئی ہے، اس میں جوابدہی کی کوئی سفارش نہیں کی گئی تھی۔

جان کربی کا کہنا تھا، ''انہوں نے ان کی سفارشات تسلیم کر لی ہیں اور وہ اس سلسلے میں کسی اضافی احتسابی اقدام کی مانگ نہیں کر رہے ہیں۔ '' جان کربی نے مزید کہا، ''ذاتی احتساب کے لیے یہ اتنا مضبوط کیس نہیں تھا۔''

امریکا نے انتیس اگست کو کابل پر یہ حملہ ایک ایسے وقت کیا تھا جب بیرونی افواج کا انخلا اپنے آخری مرحلے میں تھا اور بہت سے افغان بھی ملک چھوڑنے کی کوشش میں تھے۔ اس وقت کابل ایئر پورٹ اور اس کے آس پاس افراتفری کا ماحول تھا۔

امریکی حکام کا کہنا تھا کہ ان کے پاس ایسی خفیہ معلومات ہیں کہ شدت پسند تنظیم داعش کے ارکان انخلا کے عمل میں رخنہ اندازی کے لیے خود کش حملہ کرنے کی کوشش میں ہیں۔ اسی کو روکنے کے لیے ڈرون کی مدد سے اس کار کو میزائل سے نشانہ بنایا گیا، جس کے بارے میں شک تھا کہ دھماکا خیز مواد سے بھری یہی گاڑی حملے کے لیے استعمال ہو گی۔

تاہم اس حملے میں ایک ایسا خاندان مارا گیا جس کا ایک فرد خود ایک امریکی امدادی ایجنسی کے لیے کام کرتا تھا۔ اس میں سات بچوں سمیت دس بے گناہ افراد ہلاک ہو گئے تھے۔

نومبر میں امریکی فضائیہ کے ایک افسر لیفٹنٹ جنرل سمیع سعید نے اس سے متعلق اپنی ابتدائی تفتیشی رپورٹ میں اس حملے کو افسوسناک لیکن ''ایک ایماندارانہ غلطی'' قرار دیا تھا۔ اسی رپورٹ کی بنیاد پر سینیئر فوجی افسران نے وزیر دفاع کو اپنی سفارشات پیش کیں تاہم اس میں کسی بھی فوجی یا اہلکار کو سزا دینے کی کوئی سفارش نہیں کی گئی تھی۔

جان کربی کا کہنا تھا، ''ہم نے اس واقعے میں جو کچھ بھی دیکھا وہ اس پر عمل درآمد اور طریقہ کار کے واقعات میں خرابی تھی، یہ غفلت برتنے اور بد انتظامی کا نتیجہ نہیں تھی، نہ ہی کمزور قیادت کا نتیجہ تھی۔ اگر لائیڈ آسٹن کو اس بات کا یقین ہوتا کہ اس میں جوابدہی طے کرنا ضروری ہے، تو وہ یقینی طور پر اس قسم کی کوششوں کی حمایت کرتے۔''

زر تلافی کا وعدہ

افغان شہری ضمیر احمدی ایک غیر سرکاری امریکی ادارے 'نیوٹریشن اینڈ ایجوکیشن انٹرنیشنل‘ (این ای آئی) کے لیے کام کرتے تھے جو اس حملے میں اپنے خاندان سمیت ہلاک ہو گئے تھے۔ امریکی خفیہ ادارے نے انہیں غلطی سے داعش کے ایک شدت پسند کے طور پر شناخت کر کے ڈورن حملے کا نشانہ بنایا تھا۔

  پینٹاگون نے اکتوبر میں اعلان کیا تھا کہ اس امریکی حملے میں غلطی کی تصدیق ہو جانے کے بعد امریکا نے متاثرہ خاندانوں کی مدد کا وعدہ کیا ہے، جس میں زر تلافی کی ادائیگی بھی شامل ہے۔ امریکی فوجی حکام نے بھی بعد میں یہ اعتراف کر لیا تھا کہ اس فضائی حملے میں ہلاک ہونے والے احمدی اور دیگر نو افراد کا داعش سے کوئی تعلق نہیں تھا۔

اگست میں کابل کے بین الاقوامی ہوائی اڈے کے باہر داعش کے ایک خود کش حملہ آور نے ایک بم حملے میں 13 امریکی فوجیوں اور درجنوں افغان شہریوں سمیت بیسیوں افراد کو ہلاک کر دیا تھا اور اس حملے کے تین دن بعد امریکا نے وہ ڈرون حملہ کیا تھا، جو دس شہری ہلاکتوں کا باعث بنا اور اسٹریٹیجک غلطی ثابت ہوا تھا۔

ص ز/ ج ا (اے پی، اے ایف پی)