کوئی شکایت ہے تو رابطہ کریں، فرانسیسی ڈرگ ڈیلرز کا نوٹس

فرانس کے دارالحکومت پیرس میں واقع ایک بلند وبالا رہائشی عمارت میں آویزاں کیے گئے ایک نوٹس نے اس بلڈنگ کے باسیوں کو ایک عجیب مخمصے میں ڈال دیا ہے۔ شہر کے پرشین ڈسٹرکٹ میں واقع اس ہائی رائز بلڈنگ میں یہ نوٹس مبینہ طور پر ڈرگ ڈیلرز نے لگایا تھا۔

اس نوٹس میں تحریر ہے کہ مقصد کسی کو تنگ کرنا ہرگز نہیں ہے بلکہ ڈرگ ڈیلرز اس عمارت کے رہائشیوں سے درخواست کرتے ہیں کہ ان کے ملازمین کو اس عمارت میں اپنی کاروباری مصروفیات کے دوران تنگ نہ کیا جائے۔

یہ عمارت پیرس کے جس علاقے میں واقع ہے، وہاں حالیہ دنوں میں ڈرگ مافیا کی موجودگی بڑھی ہے۔ مقامی میڈیا کے مطابق اس مقام پر متعدد ڈرگ ڈیلرز فعال ہیں، جو نشہ آور مواد کی ڈیلیوری گھروں پر کرتے ہیں۔

نوٹس میں اہم پیغام کیا تھا؟

پیرس کی اس بلڈنگ کی لفٹ پر آویزاں کیے گئے اس نوٹس میں ڈرگ ڈیلرز نے مزید لکھا کہ 'اس عمارت میں نہ تو زیادہ گند مچایا جائے گا اور نہ ہی شور کیا جائے گا۔ ملازمین خاموشی سے اپنا کام کریں گے‘۔

اس نوٹس میں یہ درخواست بھی کی گئی ہے کہ اس بلڈنگ کے رہائشی ڈرگ ڈیلرز کے ملازمین کو ہراساں مت کریں۔ مبینہ طور پر یہ نوٹس اس عمارت میں رہنے والے ڈرگ ڈیلرز کی طرف سے لگایا گیا ہے۔

اس نوٹس میں مزید لکھا گیا کہ 'ہم آپ کی روزمرہ کی زندگی میں خلل نہیں ڈالنا چاہتے ہیں۔ ہم صرف اپنا کام کرنا چاہتے ہیں‘۔

اس نوٹس کی تصویر فرانس کے روزنامہ لے پریسنین نامی اخبار نے اپنی ہفتے کے اشاعت میں شائع کی۔

اس نوٹس میں یہ بھی لکھا ہے کہ 'ملازمین پر چیخا یا چلایا نہ جائے۔ اگر کوئی شکایت یا مسئلہ ہے تو ہم سے رابطہ کرنے سے مت ہچکچایا جائے۔‘‘

اس بلڈںگ کے کچھ رہائشیوں نے اس نوٹس کو ایک مذاق کے طور پر لیا ہے تو کچھ کا خیال ہے کہ یہ اشتعال انگیزی ہے۔ کچھ کا خیال ہے کہ ڈرگ ڈیلرز نے انہیں انتہائی غیر محسوس طریقے سے دھمکی دی ہے کہ اگر ان کے کاموں میں خلل ڈالا گیا تو وہ پرتشدد کارروائی بھی کر سکتے ہیں۔

ع ب، ع ت (خبر رساں ادارے)