کورونا وائرس: 95 ہزار سے زائد مریض، ہلاکتیں 32 سو سے متجاوز

کورونا وائرس اس وقت دنیا کے اسی ممالک میں پھیل چکا ہے۔ سبھی بر اعظموں میں اس وائرس کی موجودگی کی تصدیق ہو چکی ہے۔ براعظم ایشیا میں مشرق بعید کے ممالک میں اس کا پھیلاؤ غیر معمولی ہے اور اُس کے بعد یورپی ممالک میں بھی یہ پھیلتا جا رہا ہے۔ جمعرات پانچ مارچ کو ایک اور یورپی ملک سلووینہ میں بھی اس کی نشاندہی ایک مریض میں ہوئی ہے۔

دنیا بھر میں اس وائرس کی لپیٹ میں آ کر ہونے والی ہلاکتیں تین ہزار دو سو پچاسی ہیں۔ ان میں سب سے زیادہ ہلاکتیں چین میں ہوئی ہیں۔ چین کے بعد زیادہ ہلاکتوں والے ممالک میں ایران، اٹلی اور جنوبی کوریا سب سے نمایاں ہیں۔

چین میں حکام نے بتایا ہے کہ کورونا وائرس میں مبتلا افراد کی مجموعی تعداد اسی ہزار چار سو نو ہے۔ گزشتہ چوبیس گھنٹوں میں صرف ایک سو انتالیس مریضوں میں اس وائرس کی نشان دہی ہوئی ہے۔ اس بیماری سے ہونے والی ہلاکتیں تین ہزار بارہ ہیں۔

جنوبی کوریا میں اس بیماری میں مبتلا افراد کی تعداد تقریباً پانچ ہزار آٹھ سو ہو گئی ہے جبکہ تین اور مریضوں کے دم توڑنے کے بعد ہلاکتوں کی تعداد پینتیس ہو گئی ہے۔ اسی طرح جاپان میں بھی مریضوں کی تعداد ایک ہزار سے تجاوز کر گئی ہے۔

اُدھر امریکا میں ہونے والی ہلاکتیں گیارہ بتائی گئی ہیں۔ نیو یارک اور لاس اینجلس میں مزید مریضوں میں اس وائرس کی تشخیص ہوئی ہے۔ امریکی ایوانِ نمائندگان نے وائرس کے انسداد کے لیے تراسی بلین امریکی ڈالر کی منظوری دے دی ہے۔ لاس اینجلس کی بندرگاہ کو وائرس سے شدید متاثر قرار دیا گیا ہے۔ اس بندرگاہ پر سامان لادنے اور اتارنے میں پندرہ فیصد سے زائد کمی کا اندازہ لگایا گیا ہے۔

امریکی ریاست کیلیفورنیا میں ایمرجنسی کا نفاذ کر دیا گیا ہے۔ ریاستی گورنر کے مطابق وائرس کے مریضوں کی تعداد ترپن تک پہنچ گئی ہے۔ مختلف امریکی علاقوں میں وائرس کو کنٹرول میں رکھنے کے اقدامات جاری ہیں۔ امریکی نائب صدر نے اپنی ایک ٹویٹ میں کہا ہے کہ وفاقی حکومت کے فوری اقدامات سے ابھی تک سارے ملک میں وائرس کا پھیلاؤ شدید نہیں ہوا ہے۔

یورپی ملک اٹلی میں کووڈ انیس بیماری سے ہونے والی ہلاکتیں ایک سو سات ہو گئی ہیں۔ گزشتہ چوبیس گھنٹوں میں ہونے والی ہلاکتیں اٹھائیس بتائی گئی ہیں۔ فرانس میں اس وائرس کی تشخیص دو سو پچاسی افراد میں کی جا چکی ہے۔ جرمنی میں اس بیماری میں مبتلا مریضوں کی تعداد دو سو چالیس بتائی گئی ہے۔

ایران میں حکومت نے تقریباً تین ہزار افراد میں کورونا وائرس کی نئی قسم کی تشخیص کا بتایا ہے۔ اس مرض میں مبتلا افراد میں نائب صدر جہانگیری بھی شامل ہیں۔ بدھ چار مارچ کو ایرانی حکومت نے ہلاکتوں کی تعداد بانوے بتائی تھی۔ اس طرح چین کے بعد سب سے زیادہ ہلاکتیں یورپی ملک اٹلی میں رپورٹ کی گئی ہیں۔

 ع ح ⁄ ع س (روئٹرز، اے ایف پی)