کورونا وائرس کی وبا کے خلاف یورپی بینک کا منصوبہ

مختلف یورپی ممالک میں کورونا وائرس کی وبا کو کنٹرول کرنے کے لیے کیے گئے احتیاطی اقدامات نے معاشی سرگرمیوں کو انتہائی محدود کر دیا ہے۔ عام لوگ گھروں میں مقید ہو کر رہ گئے ہیں اور مختلف ممالک ملکی ترقی کو پسِ پشت ڈال کر وبا کو قابُو کرنے کی کوششوں میں مصروف ہیں۔

کورونا وائرس کی مسلسل پھیلتی وبا کی وجہ سے یورو زون میں کسی حد تک اقتصادی افراتفری کی صورتِ حال پائی جاتی ہے۔ بڑے بڑے کاروباری ادارے بندش کا شکار ہو چکے ہیں۔ بازارِ حصص شدید مندی کی لپیٹ میں ہیں۔ اقوام کے درمیان تجارتی سرگرمیاں نہ ہونے کے برابر ہیں۔

جمعرات، انیس مارچ کو یورپی مرکزی بینک نے یورو زون کے انیس رکن ممالک کے لیے ساڑھے سات سو ارب یورو کے ایک منصوبے کا اعلان کیا۔ اس کا نام وبائی ہنگامی خریداری بانڈ پروگرام یعنی انگریزی میں 'Pandemic Emergency Purchase Program‘ پروگرام رکھا گیا ہے۔

اس پروگرام کے تحت مرکزی یورپی بینک مختلف ضروری سامان کی خریداری کا ذخیرہ نہیں کرے گا بلکہ یہ وبائی دور میں یورو زون کی ریاستوں میں پیدا ہونے والے معاشی مصائب کو کم کرے گا۔ بینک اس منصوبے کے تحت یورو زون کی اقوام کو درپیش مشکلات کے تناظر میں حکومتوں اور کارپوریٹ شعبے کے قرضے خرید لے گا۔ یورو زون کے معاشی مشکلات کے حامل ملک یونان کے قرضے خریدنے کا بھی فیصلہ کیا گیا ہے۔

پلان کے تحت یورو زون کے رکن ممالک کی مجموعی شرح پیداوار کے چھ فیصد کے مساوی قرضے خریدے جائیں گے۔ یہ بھی فیصلہ کیا گیا ہے کہ یہ ایک عارضی اسکیم ہے اور اس وقت تک جاری رکھی جائے گی جب تک کووڈ انیس سے پیدا بحرانی حالات کا خاتمہ نہیں ہو جاتا۔ بحرانی صورت حال کے خاتمے کا تعین بھی بینک اپنے ایک خصوصی اجلاس میں کرے گا۔

اقتصادی تجزیہ کاروں نے یورپی مرکزی بینک کے پلان کو بحرانی حالات سے نمٹنے کا ایک معیاری منصوبہ قرار دیا ہے۔ ان کے مطابق مثبت انداز میں عمل پیرا ہونے سے یورو زون کی معاشی مشکلات میں یقینی طور پر کمی واقع ہو گی۔

جرمنی میں ملکی بینکوں کی تنظیم ایسوسی ایشن برائے جرمن بینکس نے واضح کر دیا ہے کہ رواں برس کے دوران اکنامک آؤٹ پُٹ میں یقینی طور پر پانچ فیصد کمی واقع ہو گی۔

ع ح، ع ت (اے ایف پی، ڈی پی اے، روئٹرز)