گوئٹے مالا میں آتش فشاں پھٹنے سے درجنوں ہلاک، الرٹ جاری

 

ڈیزاسٹر مینجمنٹ ایجنسی کے ترجمان ڈیوڈ ڈی لیون کے مطابق آتش فشاں کی جنوبی ڈھلان کی جانب واقع ایل روڈیو اور لاس لاجاس کمیونیٹیوں میں لاوے کے باعث ہلاک ہونے والوں میں کئی بچے بھی شامل ہیں۔ ی لیون کے مطابق متاثر علاقوں میں کم روشنی اور خطرناک صورتحال کے باعث گم شدہ  اور دیگر متاثرہ افراد  کی تلاش کا کام معطّل کردیا گیا ہے۔

12,346 فٹ بلند آتش فشاں دارالحکومت گوئٹے مالا سٹی کے 40 کلومیٹر جنوب مغرب میں واقع  ہے اور اس کے لاوے سے قریب کے علاقے شدید متاثر ہوئے ہیں۔ ڈیزاسٹر ری ڈکشن کے کو آرڈینیٹر، سرجیو کابانس نے ابتدائی طور پر 20 افراد کے زخمی اور 1.7 ملین افراد کے متاثر ہونے کا بتایا تھا۔

ایل روڈیو کے ایک رہائشی کے مطابق ان کے علاقے کے تمام لوگ جان بچا کر نکلنے میں کامیاب نہیں ہو سکے ہیں اور ان کے خیال میں کئی افراد آتش فشاں کے گرم کیچڑ میں ہی دفن ہو گئے ہیں۔ حکام کے مطابق ایل روڈیو میں اب بھی کئی گھر جلتے ہوئے دیکھے گئے ہیں جبکہ زخمیوں اور ہلاکتوں کی تعداد میں اضافے کا خدشہ بھی موجود ہے۔

آتش فشاؤں کا پھٹنا بڑے دریاؤں کے لیے نقصان دہ

آتش فشاں کے قریب رہنے والے وہاں سے منتقل ہو جائیں

ملکی صدر جمی مورالز نے نیشنل ایمرجنسی سروسز لانچ کرتے ہوئے شدید متاثر علاقوں کے لیے ریڈ الرٹ جبکہ ملک بھر کے لیے اورنج الرٹ جاری کر دیا ہے۔ صدر مورالز کے مطابق پولیس، ریڈ کراس اور فوج کے سینکڑوں اہلکاروں کو ایمریجنسی کارروائیوں میں حصہ لینے کے لیے بھی روانہ کیا جا چکا ہے۔

گوئٹے مالا کے فوگیو آتش فشاں کے پھٹنے کا اس برس یہ دوسرا واقعہ ہے۔ اس سے قبل فروری کے مہینے میں اس آتش فشاں سے  1.7 کلومیٹر بلندی تک راکھ اڑنے کا واقعہ پیش آیا تھا۔ گوئٹے مالا میں فوگیو کے علاوہ دو مزید فعال آتش فشاں بھی موجود ہیں۔

ع ف/ ع ا  (اے ایف پی)