یمن میں القاعدہ کی بڑی کامیابی، عالمی مندوب مستعفی

یمنی دارالحکومت صنعاء سے موصولہ مختلف نیوز ایجنسیوں کے رپورٹوں کے مطابق ملکی فوج کے اعلیٰ اہلکاروں اور مقامی باشندوں نے تصدیق کر دی ہے کہ جنوبی یمن میں پیش قدمی کرتے ہوئے القاعدہ کے جنگجوؤں اور ان کے اتحادی قبائلیوں نے خطے کے ایک بڑے ہوائی اڈے اور ایک وسیع تر آئل ٹرمینل کو اپنے کنٹرول میں لے لیا ہے۔

ایسوسی ایٹڈ پریس کے مطابق جنوبی یمن میں المکلا کے شہر کے نواح میں یمنی پیدل فوج کے سب سے بڑے بریگیڈ میں شامل دستوں کی القاعدہ کے جنگجوؤں کے ساتھ شدید جھڑپیں آج جمعرات سولہ اپریل کی صبح تک جاری رہیں۔ ان جھڑپوں کے نقطہء عروج پر القاعدہ کے عسکریت پسند اور ان کے حامی قبائلی المکلا کے ایئر پورٹ اور ایک بڑے آئل ٹرمینل کا کنٹرول حاصل کرنے میں کامیاب ہو گئے۔

یمنی فوج کے اعلیٰ اہلکاروں نے صنعاء سے ٹیلی فون پر نیوز ایجنسی اے پی کو بتایا کہ المکلا کا شہر یمن کا ایک ساحلی شہر ہے، جہاں متعین فوجی دستوں کا کام اس خطے کی حفاظت تھا۔ تاہم لڑائی کے دوران وہاں متعین بریگیڈ کے بہت سے ارکان اپنی جانیں بچانے کے لیے فرار ہونے پر مجبور ہو گئے۔

ان فوجی ذرائع نے اپنی شناخت خفیہ رکھے جانے کی شرط پر بتایا کہ القاعدہ کے عسکریت پسند یمن کے سب سے بڑے صوبے حضرموت کے دارالحکومت المکلا پر قبضے کے بعد بڑی آسانی سے وہاں کی بندرگاہ، آئل ٹرمینل اور پھر ہوائی اڈے پر بھی قابض ہو گئے۔ یمن میں القاعدہ کی اس شاخ کے بارے میں یہ بات بھی اہم ہے کہ اس دہشت گرد نیٹ ورک کی یہی شاخ دنیا بھر میں اس تنظیم کے تمام ذیلی شاخوں میں سے سب سے طاقتور اور خطرناک تصور کی جاتی ہے۔

نائب صدر بحاح کی امید پسندی

اسی دوران حال ہی میں یمن کے نائب صدر مقرر کیے جانے والے خالد بحاح نے آج جمعرات کے روز امید ظاہر کی یمن میں آئندہ دنوں کے دوران ایسی صورت حال دیکھنے میں آ سکتی ہے کہ امن کوششوں کو تقویت دیتے ہوئے خانہ جنگی کے شکار اس ملک کو داخلی طور پر متحد کیا جا سکے اور اسے سعودی سربراہی میں قائم عسکری اتحاد کے دستوں کی طرف سے زمینی مداخلت سے بچایا جا سکے۔

اتحادی حملے چوتھے ہفتے میں

دریں اثناء سعودی قیادت میں یمن میں حوثی شیعہ باغیوں کے خلاف قائم عسکری اتحاد کی طرف سے ان باغیوں کے ٹھکانوں پر فضائی اور بحری حملے اپنے چوتھے ہفتے میں داخل ہو گئے ہیں جبکہ کئی فوجی ماہرین کا خیال ہے کہ سعودی عرب نے اپنی سرزمین پر مختلف عرب ملکوں کے ساتھ مل کر جن فوجی مشقوں کا منصوبہ بنایا ہے، وہ دراصل یمن میں زمینی فوجی مداخلت کا پیش خیمہ ثابت ہو گا۔

چھ سو ہلاکتیں

سعودی دارالحکومت ریاض سے آمدہ رپورٹوں کے مطابق اقوام متحدہ کے ذرائع نے بتایا ہے کہ یمن میں حوثی باغیوں کے خلاف فضائی حملوں کے آغاز کے بعد سے اب تک وہاں 600 سے زائد افراد ہلاک، 2200 سے زائد زخمی اور قریب ایک لاکھ بے گھر ہو چکے ہیں۔ جرمن نیوز ایجنسی ڈی پی اے کے مطابق یمن میں صرف آج جمعرات کے روز اتحادی فضائی حملوں میں کم از کم 32 افراد مارے گئے، جن میں اکثریت عام شہریوں کی تھی۔ یہ تازہ حملے زیادہ تر یمنی دارالحکومت صنعاء کے شمال میں کیے گئے۔

عالمی مندوب مستعفی

اسی دوران صنعاء سے موصولہ دیگر رپورٹوں میں بتایا گیا ہے کہ یمن کے لیے اقوام متحدہ کے خصوصی مندوب جمال بنعمر اس عرب ریاست میں جاری وسیع تر خونریزی رکوانے میں ناکامی کے بعد اپنے عہدے سے مستعفی ہو گئے ہیں۔ اس بات کا اعلان اقوام متحدہ کی طرف سے کیا گیا ہے۔ اے ایف پی کے مطابق یمن میں تیزی سے خراب تر ہوتی ہوئی صورت حال میں عالمی ادارے کے مندوب جمال بنعمر کا مستعفی ہو جانا وہاں جاری تنازعے کے سیاسی حل کی تلاش میں سفارتی کوششوں کی ناکامی کو اور بھی یقینی بنا دیتا ہے جبکہ سعودی فضائی حملے بھی جاری ہیں اور حوثی باغی بھی جہاں تک ہو سکتا ہے، اپنے زیر قبضہ علاقوں میں توسیع کی کوششیں کر رہے ہیں۔