یورپی رہنما ترکی کے ساتھ بہتر تجارتی تعلقات کے خواہاں

یورپی یونین کے رہنماؤں نے 25 مارچ جمعرات کو ترکی کے ساتھ ممکنہ تجارتی روابط کو مزید مضبوط کرنے کی پیشکش کی ہے۔ بلاک نے انقرہ سے کہا ہے کہ وہ جمہوری اصولوں پر قائم رہتے ہوئے مشرقی بحیرہ روم میں توانائی کی دریافت کے حوالے سے تنازعے کو مزید الجھانے سے گریز کرے۔

اس حوالے سے ایک دستاویز ڈی ڈبلیو کو حاصل ہوئی ہے جس میں یورپی یونین کے رہنماؤں نے کہا ہے، '' ہم ترکی سے بین الاقوامی قانون کی خلاف ورزی کے تحت کسی نئی اشتعال انگیزی یا پھر یکطرفہ قسم کی کارروائیوں سے گریز کرنے کا مطالبہ کرتے ہیں۔''

اس دستاویز کے مسودے کے مطابق چونکہ ترک صدر طیب ایردوآن نے بحیرہ روم میں گیس کی دریافت کے حوالے سے ٹکراؤ کی پالیسی سے گریز کیا ہے اس لیے بطور انعام انہیں یورپی یونین نے اپنی کسٹمزیونین کے ساتھ مزید گہرے روابط قائم کرنے اور رسائی دینے کی تیاری شروع کرنے کی بات کہی ہے۔

اس میں سن 1990 کے دور کے تجارتی معاہدے میں مزید توسیع کرتے ہوئے سروسز، کاشتکاری اشیاء اور سرکاری سطح پر خریداری کو وسعت دینے کی بھی بات کہی گئی ہے۔

ترکی یورپی یونین کی رکنیت کا بھی امیدوار ہے اور کسٹم یونین کی توسیع سے اسے دنیا کے سب سے بڑے تجارتی بلاک کی داخلی مارکیٹ تک رسائی حاصل ہوجائے گی۔ اس سے تقریبا ًتمام ساز و سامان اور ہر طرح کی سروسز بلا روک ٹوک جاری رہ سکیں گی۔

ترکی کے گیس تنازعے کا ایک حل

ان قراردادوں کا مقصد انقرہ کو ایک ایسی مضبوط ترغیب فراہم کرنا ہے جس سے کہ ترکی گیس کے حوالے سے یونان اور قبرص کے ساتھ اپنے تنازعات تعمیری انداز میں حل کر سکے۔

گزشتہ دسمبر میں اسی تنازعے کے حوالے سے یورپی یونین نے ترکی پر شدید قسم کی پابندیاں عائد کرنے کی دھمکی دی تھی۔ اس کے بعد ترکی نے مشرقی بحیرہ روم میں توانائی کی دریافت کی اپنی مہم ختم کر دی تھی اور اس پر بات چیت کا اشارہ دیا تھا۔

اس گیس تنازعے پر قبرص اور یونان ایک ساتھ ہیں جبکہ فرانس بھی ان کا حامی ہے دونوں ہی متنازعہ پانیوں میں ترکی کی گیس تلاش کرنے کی کوششوں کی مخالفت کرتے رہے ہیں۔

سنہ 1974 میں قبرص میں بغاوت کے دوران ترکی نے مداخلت کی تھی جس کی وجہ سے وہ دو حصوں میں تقسیم ہوگیا تھا۔ ترکی کا موقف ہے کا اس کا حل دو ریاستی ہے جبکہ قبرص اس کی بھی مخالفت کرتا ہے۔

قبرص کا ایک حصہ یونان کے ساتھ اتحاد چاہتا تھا جبکہ اس کا دوسرا ترک حامی حصہ آزادی کا حامی ہے۔ اس سلسلے میں اقوام متحدہ جینوا میں آئندہ 27 اور 29 اپریل کے درمیان ایک غیر رسمی مذاکرات کا اہتمام کر رہا ہے۔ اس بات چیت میں ترکی، یونان اور برطانیہ بھی شریک ہوں گے۔

پناہ گزینوں سے متعلق معاہدے پر نظر ثانی

یورپی یونین کے سفات کار یہ بھی چاہتے ہیں کہ یورپی کمیشن ترکی، اردن اور لبنان میں موجود لاکھوں شامی پناہ گزینوں کی امداد جاری رکھنے کے نئے راستوں کو تلاش کرنے پر بھی غور و فکر کرے۔

اس حوالے سے یورپی یونین سن 2016 کے اس معاہدے پر مزید کام کرنا چاہتا ہے جس کے تحت پناہ گزینوں کی آمد یونان کے جزیرے تک محدود کر دی گئی تھی۔ اس کے لیے یورپی یونین نے ترکی کو تقریبا ًچھ ارب یورو کی رقم مہیا کی تھی۔

ص ز/ ج ا  (اے پی، اے ایف پی، ڈی پی اے، روئٹرز)