یونانی وزیراعظم روس کے دورے پر، یورپی رہنما فکر مند

کریملن میں روسی صدر پُوٹن کے ساتھ ملاقات کرنے والے یونانی وزیراعظم الیکسِس سِپراس نے اپنے روسی دورے کے حوالے سے کہا کہ وہ روس اور یونان کے تعلقات کو ایک نئی شروعات دینا چاہتے ہیں۔ مبصرین کے مطابق یورپی یونین کی پابندیوں کی زَد میں آئے ہوئے روس کے ساتھ سِپراس کے تعلقات میں اضافہ ایتھنز حکومت کے لیے نقصان دہ بھی ہو سکتا ہے۔ سِپراس کا یہ بھی کہنا تھا کہ وہ روسی دورے سے علاقائی سلامتی میں مزید استحکام کے مُتمنی ہیں۔ ملاقات کے موقع پر روسی صدر نے دونوں ملکوں کے عوام کے درمیان پائے جانے والے مذہبی رابطوں کو بھی اہم قرار دیا۔ پُوٹن کے مطابق یونانی وزیراعظم کا دورہ موجودہ حالات کے عین مطابق ہے اور دونوں ملکوں کے خراب تعلقات کو اب بحال کرنے کا وقت آ گیا ہے۔

سِپراس اور پُوٹن نے ملاقات کے بعد ایک مشترکہ پریس کانفرنس سے بھی خطاب کیا۔ پریس کانفرنس میں پُوٹن نے روس اور یونان کے ممکنہ اقتصادی روابط کا ذکر کرتے ہوئے کہا کہ ماسکو اور ایتھنز کے بہتر معاشی تعلقات سے یونان کو قرضے دینے والے اداروں اور اقوام کو بھی فائدہ پہنچ سکتا ہے۔ روسی صدر کے مطابق یونان ترک اسٹریم گیس پراجیکٹ کے ذریعے یورپ کو قدرتی گیس کی فراہمی پر حاصل ہونے والی راہداری سے کئی ملین یورو کما سکتا ہے۔ دونوں لیڈروں نے ترک اسٹریم لائن پراجیکٹ پر بھی گفتگو کی لیکن تکنیکی معاملات پر مفصل گفتگو کے بعد ہی دونوں حکومتیں کسی حتمی فیصلے پر پہنچ پائیں گی۔ پُوٹن نے یہ بھی واضح کیا کہ یونانی وزیراعظم نے مالی امداد کا کوئی ذکر نہیں کیا ہے۔

پریس کانفرنس میں یونانی وزیراعظم نے کہا کہ یورپ میں پیدا یوکرائنی بحران پابندیوں کا ایک موذی چکر ہے اور اِس سے ہر صورت باہر نکلنا وقت کی ضرورت ہے۔ سِپراس کے مطابق اگر علاقائی سلامتی کے لیے بحران اور پابندیوں کو پسِ پشت نہ ڈالا گیا تو اِس چکر سے یورپی اقوام کا باہر آنا خاصا مشکل ہو گا۔ غیر ملکی قرضوں کے حوالے سے سِپراس نے کہا کہ اُن کی حکومت اپنی غیر ملکی ذمہ داریوں سے پوری طرح آگاہ ہے۔ یونانی وزیراعظم نے رپورٹرز پر واضح کیا کہ یونان ایک خود مختار اور آزاد ملک ہے اور اُس کی خارجہ پالیسی کثیرالجہت ہے جس کا تمام یونانیوں کے لیے مفید ہونا اہم ہے۔

روسی صدر نے مشترکہ پریس کانفرنس میں یہ بھی واضح کیا کہ ماسکو کی جانب سے یورپی یونین کی اقوام پر عائد فوڈ پراڈکٹس کی امپورٹ پر یونان کو رعایت دینا مشکل ہو گا۔ پُوٹن نے کہا کہ یورپی ملکوں پر روسی پابندی سے یونان بھی بہر حال متاثر ہے اور یہ واقعی افسوس ناک صورت حال ہے لیکن یورپی یونین کے کسی ایک رکن ملک کو استثنیٰ نہیں دیا جا سکتا۔ پریس کانفرنس سے قبل پُوٹن نے سِپراس کے ساتھ ملاقات کے بعد سرکاری ٹیلی وژن پر بیان ریکارڈ کرواتے ہوئے یونانی فوڈ پراڈکٹس کی امپورٹ پر پابندی کو نرم کرنے کا اشارہ دیا تھا۔ ایسے اندازے لگائے جا رہے ہیں کہ سِپراس اپنے روسی دورے سے قرضہ دینے والے اداروں اور ملکوں کے ساتھ معاملات کو مزید آگے بڑھانے کی کوشش کر سکتے ہیں۔