የአንጌላ ሜርክል በፈረንሳይ የመጨረሻ ይፋዊ ጉብኝት  

የፈረንሳዩ ፕሬዚዳንት ኤማኑኤል ማክሮ ከስልጣናቸዉ ለመሰናበት ጥቂት ጊዜያት የሚቀራቸዉን የጀርመንዋን መራሂተ መንግሥት አንጌላ ሜርክልን ትናንት ምሽት በኤሊዜ ቤተ መንግሥት ደማቅ አቀባበል አደረጉላቸዉ። ፕሬዚዳንት ማክሮ እና መራሂተ መንግሥት አንጌላ ሜርክል በዓለም አቀፍ እና አዉሮጳ ዋና ዋና ጉዳዮች ላይ ተወያይተዋል። የትናንቱ የሊዜ ቤተ-መንግሥት ስነ-ሥርዓት በፈረንሳይ የሜርክል የመጨረሻ አቀባበል ተብሎለታል። የፊታችን መስከረም 16 በጀርመን ምርጫ እስኪካሄድ እና ቀጣዩ የመንግሥት መሪ ፓርቲ እስኪታወቅ የፈረንሳዩ ፕሬዚዳንት ኤማኑኤል ማክሮ እና መራሂተ መንግሥት በፍራንኮ-ጀርመን ግንኙነት እጅ ለእጅ ተያይዘዉ ስራቸዉን በትብብር እንደሚቀጥሉ ተገልፆአል። ሁለቱ መሪዎች ትናንት ምሽት በአፍጋኒስታን ቀዉስ፤ በሊቢያ፤ በኢራን እና በዩክሬይን ጉዳዮች ዙርያ በዋና አጀንዳነት አንስተዉ መነጋገራቸዉ ተመልክቶዋል። በሌላ በኩል የአዉሮጳ ዋና ዋና ተግዳሮቶች በተባሉት፤ በመከላከያ ጉዳዮች፤ በስደተኞች እና ተገን ጠያቂዎች እንዲሁም በዲጂታል መረጃ ልዉዉጥ ላይ ሁለቱ መሪዎች የመከሩባቸዉ ጉዳዮች መሆናቸዉም ተመልክቶአል። 

ሃይማኖት ጥሩነህ
አዜብ ታደሰ 
እሸቴ በቀለ